Un Encuentro Informativo tocante ‘Steelpan music’

Fundacion Herencia Cultural Inmaterial conhuntamente cu Biblioteca Nacional Aruba ta presenta un Encuentro Informativo cu e tema ‘Steelpan Music’. Esaki ta tuma lugar na biblioteca diaranson dia 25 di juni y ta cuminsa 7or di anochi, na Playa. E actividad ta uno publico y ta gratis.

Durante e anochi lo presenta un poco di e historia di musica Steelpan pa medio di un documentario di Rebecca Roos (produccion) y Giovanni Muller ( direccion, naracion y script). E documentario ta carga e titulo ‘Steelband: eco di un gran epoca’ y ta forma parti di e serie ‘Tesoro Arubano’ di Rebecca Roos. Co-produccion y edicion tabata den man di Jado Maduro y camera di Ingmar Maduro.
Despues ta sigui cu presente y futuro di e genero di musica aki cu contribucion di dos musico y ruman, Lee y Nico Connor. E dos musiconan aki ta haci hopi esfuerso pa tene musica di Steelpan bibo na Aruba. Nan ta yiu homber di sr. Edgar Connor (d.f.m.) kende den añanan ’50 te cu ’90 di siglo pasa tabata e cara di musica di steelpan den Aruba su carnaval y tabata un persona clave den historia cultural di Aruba. Nico y Lee lo conta algo di nan experencia di biba y pasa e tradicion musical na Aruba pa otro musico y principalmente hoben. Tambe nan ta toca e obstaculonan cu nan ta haya riba nan caminda.

Nico Connor recientemente a trece un produccion nobo riba mercado titula “Aruba’s Sweet Pan Man,”. Esaki ta e di dos volumen di “Crioyo” pan music. Lansamento di e album aki a tuma lugar riba Dia di Himno y Bandera. Lee Connor ta trahando riba un repertorio nobo, explorando asina direccionnan nobo y excitante cu su steelpans y saxofono y e ta finalisando su Steelpan project.
Cu e Encuentro Informativo aki Fundacion Herencia Cultural Inmaterial kier trece poco mas informacion di e tradicion rico aki na Aruba y kier drenta den discusion con ta e mihor manera pa pasa e tradicion musical aki pa hubentud. Tur amante di musica di steelpan y otro interesadonan ta keda invita pa e Encuentro Informativo aki.
 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn