Un festival di buki pa mucha cu 16 autor

Noris van Lis-Donata  ta un participante nobo na e festival di buki pa mucha di biblioteca e aña aki. Biblioteca ta trece un otro edicion di e famoso festival di buki pa mucha cu e meta pa stimula mucha pa lesa y pa stimula combersacion y interes pa autor di buki pa mucha.

Cada aña e festival tin otro tema y un grupo di autor y ilustrador di buki pa mucha for di Aruba, Islanan ruman di Caribe Hulandes, Hulanda y otro pais ta bishita mas cu sesenta scol riba nos isla. E tema di e edicion aki ta “Multiculturalidad” y e lema ta: ‘Nos mundo ta draai y ami ta sigui lesa bay’. E festival di buki pa mucha ta tuma lugar den e siman di 2 pa 9 di November 2012.

Como mucha sra. Noris van Lis-Donata tabata gusta lesa. E tempo ey no tabatin buki pa mucha na Papiamento. Noris y su rumannan tabata spaar henter aña papel di bleki lechi Friese vlag pa haya punto pa por cambia pa buki na Hulandes. Asina vakantie grandi cuminsa su mama tabata bay na e agencia pa busca buki na Hulandes pa nan. Noris ta corda e prome siman di vakantie manera un fiesta di buki na cas.

Ora luna ta yen su mama tabata sinta cu tur yiu pafo den claridad di luna y conta storia. Tur yiu ta haya un beurt pa conta storia. E claridad di luna tabata ilumina nan fantasia. Alabes nan tabata realisa di ta biba riba un pida tera cu Dios a traha pa nos tur. Di chikito su mama a siña nan pa tin confiansa den e ayudo di nos Creador. Na edad di 15 aña Noris a haya un studiebeurs pa bay studia pa analista medico na Hulanda. El a termina su estudio cu 19 aña y a bay traha 3 aña na laboratorio di gobierno na Aruba. Den e temporada aki Noris a bira welpenleidster y e tabata yuda guia e welpennan den bario di Dakota. Noris tabata gusta e actividadnan manera speurtocht di welpen y padvinders den naturalesa.

Na 1968 Noris a regresa Hulanda y el a forma parti di e redaccion di e boletin mensual cu tabata yama “Contacto Antiyano”. Noris a casa na Hulanda for di cual matrimonio a nace dos yiu muhe. Bek na Aruba Noris a bira miembro di Jaycees na 1978 y e tabata pa dos aña lider di proyecto di un programa pa mucha cu tabata yama “Gosinet” na radio Carina e tempo ey. Na 1985 Noris a termina su studio di ley y a traha algun aña como consehero huridico na Departamento di Enseñansa. Durante e periodo di su trabou den comunidad Noris a nota cu ta hopi importante pa hende desde chikito crece cu norma y balor.

Asina a cuminsa crece e idea cerca Noris pa trece algun mensahe practico tocante e existencia di nos Creador den forma di un buki pa muchanan. Den e buki ta duna e mucha algun ehempel con pa siña gradici nos Creador pa tur loke ta bon pe den cas y pafo di cas. E buki aki ta pa muchanan cu a cuminsa explora e cas y e ambiente unda nan ta biba. Den diferente forma e mucha ta reconoce e balor grandi di e naturalesa cu ta forma e ambiente rond di cas y cu ta un pida di nos pais crea pa nos Creador. Tambe ta mustra e mucha riba e aprecio y respet cu mester tin pa un persona mayor cu ta duna e mucha su cuido necesario.

Noris ta bisa: Mi buki “Ban Bisa Danki” ta un granito di arena pa formacion di nos muchanan.

Festival di buki pa mucha
Mas cu 60 scol basico ta involvi, pa un siman largo, den e festival grandi di buki. Nan lo haya bishita di un autor den klas. Muchanan di scol por spera presentacion di: Hulanda: Mylo Freeman, Tjibbe Veldkamp, Evelien van Dort. Corsou: Tio Ali (Alvin Inecia), Roland Colastica. Boneiro: Tio Gabi(Gabriel Mercera), Kathleen Thielman. St.Maarten : Loeki Morales, Surnam/Corsou :

Hilli Arduin, Jamaica : Amina Blackwood Meeks, Aruba: Robert Reeberg, Olga Buckley, Desiree Correa, Mariebelle Arends, Dolfi Kock, Dora Lauffer-Mathilda, Noris van Lis-Donata, Olga Orman,

 

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn