Un festival di buki pa mucha yen di sorpresa

Un festival di buki pa mucha yen di sorpresa

Olga Buckly  ta un di e autornan cu ta participa na e festival di buki pa mucha di biblioteca. Apertura di e Festival ta dia 2 di november y e bishita na scolnan ta tuma lugar den e siman di 5 pa 9 di November 2012. Cada aña e festival tin otro tema y un grupo di autor, ilustrador y contado di cuenta di buki pa mucha for di Aruba Antiyas y Hulanda y otro pais ta bishita mas o menos 65 di e 68 scolnan riba nos isla. E tema di aña 2012 ta “ Multiculturalidad” y e lema ta: ‘Nos mundo ta draai y ami ta sigui lesa bay’. Esaki ta e di 20 festival cu biblioteca ta organisa pa stimula mucha pa lesa y pa stimula combersacion y interes pa autor di buki pa mucha como tambe ilustrador y artista.

Olga Buckley ta maestro di scol di alma y curazon. Casi henter su carera el a traha den enseñansa special. Aki el a mira e bentaha grandi di siña e mucha algo den su idioma materno. For di tempo cu ainda Hulandes tabata idoma di instruccion den enseñansa special, el a cuminsa duna les scondi na Papiamento na Scol Kibrahacha. El a sigui mayoria di curso y tayer riba tereno di Papiamento y a termina e studio di Papiamento di Tres Grado cu exito.

Actualmente Olga ta penshona. E ta traha 3 dia pa siman, naturalmente den enseñansa special. E dos otro dianan e ta dedica completamente na promocion di lesamento. Lesamento y literatura ta Olga su pasionnan di mas grandi. E pasionnan aki a motiv’e pa lansa na 2007 e proyecto di promocion di lesamento, Bon Nochi, Drumi Dushi. Awendia BNDD ta bon conoci den nos comunidad, danki na e entusiasmo y motivacion di e lesadonan cu ta bishita nos muchanan pa conta storia. Olga ta convenci cu pa crea un clima di lesamento riba nos isla nos mester hiba e placer di lesamento cerca e mucha den su ambiente di cas. Olga ta haya cu buki ta un herment placentero pa explora mundo y siña conoce bo mes. Olga a presenta e proyecto na Corsou, Surinam, St. Maarten y St. Eustatius.

Na 2011 Olga a ricibi e Prins Bernhard Cultuurfonds Prijs pa promocion di lesamento pa e proyecto. Na momento di ricibi e premio Olga a enfatisa cu e ta tuma e premio na nomber di directiva di Fundacion Bon Nochi Drumi Dushi, pasobra sin nan sosten e proyecto no ta posibel. E aña aki Fundacion Lanta Papiamento a otorga Fundacion Bon Nochi Drumi Dushi e premio Chuchubi pa su esfuersonan incansabel pa promove Papiamento.

Olga ta skirbi poesia y buki pa mucha. Na 2002 el a publica su prome tomo di poesia pa adulto ‘Curashi’. Su di dos tomo ‘Sin wak patras’ a keda publica na 2008. E tomo ta contene 35 poema y varios pensamento.

Na 2006 el a publica su prome buki di mucha ‘Bencho ta dual’, e prome buki di e serie di Bencho. E di dos buki di e serie aki, ‘Bencho ta gana un bais’ a keda publica na 2008. Den e serie di Bencho e personahe principal ta crece den transcurso di tempo. Olga ta trahando duro pa publica e di 3 buki di e serie na 2013, hunto cu su di 3 buki di poesia. E personahe di Bencho a nace hopi aña pasa, for di un custumber cu Olga tabata tin di para les, cana bay den huki di lesa y cuminsa inventa un storia, pa gana e atencion bek di e muchanan.

Olga ta co-autor di: Antillenboek; Bronnenboek. Un buki cu serie di les cu Antiya como tema, publica na 1983 pa IVIO Leystad Hulanda. Na 1996 Olga a forma parti di e grupo di traductor cu tabatin e traduccion di e diario di Anna Frank na Papiamento na su encargo. El a participa na diferente tayer di skirbi y conta storia y a duna tayer di poesia y di skirbi. E aña aki el a traduci hunto cu Desiree Correa e buki “Prinses Ivana” di Hilli Arduin.

Festival di buki pa mucha
Diferente autor, ilustrador y contado di cuenta di Aruba, Corsou, Bonaire, Sint Maarten,Hulanda, Jamaica y Surman ta participa na e festival anual. Muchanan por spera presentacion di: Hulanda: Mylo Freeman, Tjibbe Veldkamp, Evelien van Dort y Sjoerd Kuyper. Corsou: Tio Ali (Alvin Inecia), Roland Colastica. Boneiro: Tio Gabi(Gabriel Mercera), Kathleen Thielman. St.Maarten : Loeki Morales, Surnam : Hilli Arduin, Jamaica : Amina Blackwood Meeks, Aruba: Robert Reeberg, Olga Buckley, Desiree Correa, Mariebelle Arends, Dolfi Kock, Dora Lauffer-Mathilda, Noris van Lis-Donata, Olga Orman.

Pa un siman largo biblioteca ta presenta un festival di buki atractivo y diverso. Autornan ta bishita scolnan pa presenta nan mes y conta algo di nan buki, tambe pa lesa fragmento for di nan buki of di e trabou di skirbi buki. Ta e intencion pa stimula un interaccion entre mucha y autor. Despues di merdia tin diferente presentacion tambe na biblioteca Playa y San Nicolas.

 

 





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn