Un festival di buki pa mucha yen di sorpresa

Mariebelle Arends ta un di e autornan cu ta participa na e festival di buki pa mucha di biblioteca. E festival di buki pa mucha ta tuma lugar den e siman di 5 pa 9 di November 2012. Cada aña e festival tin otro tema y un grupo di autor y ilustrador di buki pa mucha for di Aruba Antiyas y Hulanda y otro pais ta bishita sesenta scol riba nos isla. E tema di e aña 2012 ta “ Multiculturalidad” y e lema ta: ‘Nos mundo ta draai y ami ta sigui lesa bay’. Esaki ta e di 20 festival cu biblioteca ta organisa pa stimula mucha pa lesa y pa stimula combersacion y interes pa autor di buki pa mucha como tambe ilustrador y artista.

Naci na Aruba, Mariebelle Arends ta maestra na Arco Iris Kleuterschool desde 1999. Semper e tabata tin e deseo pa bira maestra. Dia cu el a termina su estudio na Aruba e instituto pa bira maestra tabata sera. El a dicidi di sigui su estudio den Business Administration na F.I.T, Melbourne Florida y el a gradua na 1988. Mariebelle ta bisa: “Mi soño pa bira maestra a bira realidad na 1996, dia mi a haya e oportunidad pa bay studia na Instituto Pedagogico Arubano (IPA). Pa un curso di Papiamento na IPA mi colega Lorena Boekhoudt Almary y mi persona a skirbi un buki na Papiamento, titular “Niki ta bay scol” Mi a probecha di traha e buki cu potret, ya cu mi hobby ta saca potret. Durante mi stage den un 2de klas, mi a skirbi e buki “Ipi Sushi y su Cabrito Ito”, inspira pa dibuhonan di Sr. F. Meenhorst (q.e.p.d). Meta di e contenido di e buki tabata pa presenta un les. E buki aki mi no a publica ainda.”

Autornan y ilustrador
Diferente autor y ilustrador di Aruba, Corsou, Bonaire, Sint Maarten,Hulanda, Jamaica y Surman ta participa na e festival anual. Muchanan por spera presentacion di: Hulanda: Mylo Freeman, Tjibbe Veldkamp, Evelien van Dort y Sjoerd Kuyper. Corsou: Tio Ali (Alvin Inecia), Roland Colastica. Boneiro: Tio Gabi(Gabriel Mercera), Kathleen Thielman. St.Maarten : Loeki Morales, Surnam : Hilli Arduin, Jamaica : Amina Blackwood Meeks, Aruba: Robert Reeberg, Olga Buckley, Desiree Correa, Mariebelle Arends, Dolfi Kock, Dora Lauffer-Mathilda, Noris van Lis-Donata, Olga Orman

Pa un siman largo biblioteca ta presenta un festival di buki atractivo y diverso. Autornan di Aruba, Corsou, Hulanda, Surnam y Jamaica ta bishita scolnan pa presenta nan mes y conta algo di nan buki, tambe pa lesa fragmento for di nan buki of sea hasi un wega cu e muchanan. Ta e intencion pa stimula un interaccion entre mucha y autor. Despues di merdia tin diferente presentacion tambe na biblioteca Playa y San Nicolas.Di 3’or pa 4’or pm.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn