We are Aruba

Linda Reijnders, periodista na Amigoe di Aruba ta presenta su buki ‘We are Aruba’ na  Arubiana/Caribiana. E presentacion ta tuma lugar diahuebs anochi dia 3 di december di 7or pa 9or den hardin di Arubiana situa na Bachstraat 5.

Aruba ta un cocktail di hende di tur parti di mundo y cultura. Esaki ta haci Aruba su comunidad diverso cu ingredientenan di diferente sabor, holo y color. Autor Linda Reijnders a ilumina pa 2 aña largo e rikesa di e diversidad den su columna den Amigoe di Aruba ‘Aruba Cocktail’. Tur siman el a presenta un entrevista cu un persona cu ta bini for di otro tera y ta forma parti di nos comunidad. Esaki a resulta den un coleccion di perfil impresionante y cu ta activa bo imaginacion. Un bista special riba e comunidad colorido y cultura Arubano ta locual e autor ta ofrece e lesador. E coleccion di entrevista a keda publica den un buki na Hulandes y tambe Ingles titula ‘We are Aruba’.

Linda Reijnders a entrevista mas cu setenta persona cu ta biba na Aruba, entre nan por ehempel e doño di un bar-restaurant Colombiano, un persona di Siria, e consul di Israel y un kite-surfer di Slovakia. Tur a bin biba na Aruba cu un soño pa realisa. E buki ta cuminsa cu un bishita cerca un señora Rubiano. E autor a haya inspiracion di su interes personal y pasion pa hende y cultura y e ta ofrece e lesador un gira den comunidad di awendia na Aruba. Esaki pa medio di combersacionnan interesante, storianan personal y comparti experiencia di muda en busca di un futuro diferente.

‘We Are Aruba’ ta un buki pa lesa of djis wak aden. E potretnan y ilustracionnan ta conta storia riba nan mes mescos cu e storianan skirbi. Lay-out di e buki tabata den man di Joost Howard (ADCTRA) y e imagen riba portada ta di fotografo Paul van Driel. Coreccion Hulandes ta di sr. Nico van der Zee. E buki a keda traduci na Ingles dor di sra. Gina Ramsbottom. E buki ta na benta na librerianan local y na Hulanda via bol.com

E autor ta gradici e instancianan cu a duna sosten financiero pa por realisa e produccion, Prins Bernhard Cultuurfonds Caribisch gebied, Unoca, Ministerio di Turismo, Transporte, Sector Primario y Cultura, ATSA y Amigoe.

Pa mas informacion y contacto cu e autor tin un pagina riba facebook yama ‘We Are Aruba’ y email: wearearuba74@gmail.com.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn