Weekend di cuenta di hada

E weekend tras di lomba 200 mucha y mayor a gosa di diferente cuenta di hada durante e actividad nobo di Fundacion Bon Nochi Drumi Dushi conhuntamente cu Scol di Arte y UNOCA; Tanto Cuenta. E contadonan experiencia a trasforma e escenario di Scol di Arte den un berdadero mundo magico, cu su castiyo y figuranan di cuentanan di hada conoci, manera Capa Cora, Hans y Greta, e Sapo Prins, Sneu Blanco y e Pushi cu boots.

E magia riba escenario a toca e contadonan mes tambe, asina nos por a gosa di e storia di e Sapo Prins conta door di Hada Diana y Hada Caluda. E sapo gordo, vies tur lebelebe, cu a saca e bala di e prinses for di awa, ta resulta di ta e prins bon tipo cu ta casa cu e prinses despues.

Contado Richard a drenta e figura di e E pushi cu boots hopi sabi pa conta con e ta uza yen di triki pa gara un coneu gordo y diki y otro delicia pa hiba pa e markis di Carabas.

Den e ultimo storia; Hans y Greta, Hada Martica y Bruha Lupita a paralisa e muchanan ora nan a conta con e madrasa di Hans y Greta, e bruha djente mahos huña preto vies, tabata menasa di come Hans y Greta cu weso y tur.

Durante tur tres presentacion e contadonan tabata sa di gara e publico den trance y percura pa constante interaccion.

FBNDD a haya masha hopi comentario positivo di mayor y hopi peticion pa ripiti e actividad den otro bario.





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn