Wim Rutgers

“Buitengewoon Wim”. Discurso di Irais Sankatsing-Nava, 7 di december 2007, Aula di Universidad di Aruba

Bon nochi señor Gobernador di Aruba, bon nochi tur presente, bon nochi Professor. Pa Departamento di Arubiana di Biblioteca Nacional Aruba ta un gran placer pa por comparti cu professor Wim Rutgers e anochi alegre aki.

Durante e ultimo 30 añanan, Wim a pasa hopi ora den Arubiana. Si no ta pa haci investigacion of pa revisa kico nos tin na documentonan, e tabata tey pa traha riba un publicacion, duna nos conseho of participa den algun proyecto di Biblioteca Nacional Aruba, semper cu un gran compromiso cu Arubiana. Incansabelmente e ta motiva tur escritor of editor pa deposita un ehemplar di nan buki den e coleccion nacional di Arubiana.

Na tur momento cu nos a aserca Wim pa su apoyo of contribucion cu su experticio riba campo di nos literatura y arte, e tabata tei cla pa yuda nos cu dedicacion.  Den Departamento Arubiana nos  ta custuma pa tende e frase: “Ban puntra Wim!”

Un di e caracteristica remarkabel di Wim, aparte di su trankilidad di semper, ta su modestia. Sin embargo, na e ocasion aki, ta bon pa subraya brevemente e importancia di Wim pa e literatura di Aruba, na prome lugar como critico literario y na di dos lugar como compilador y historiador di e patrimonio literario di Aruba. Y nos no mester  lubida su trabao riba tereno di enseñansa.

Tin un eterno disputa kico ta literatura y kico no ta forma parti di dje.

Esey ta haci e trabao di e critico literario central, cu no semper ta un trabao grato. E tarea di un critico no ta pa djis elogia, tampoco pa djis critica, pero na prome lugar pa vigila calidad. E critico di literatura tin e tarea permanente pa opina acerca di e trabao di otro, pa su mehoramento den funcion di e avance di nos literatura y pa identifica desaroyonan. Wim semper a logra combina e tarea contradictorio aki di expresa e critica na unda tin mester, pero sin frustra e afan di e artista di sigui crea. E por a soluciona e dobel tarea aki, pasobra el a conoce e arte di ta un critico honesto, pero semper lagando e autor den su dignidad, pa no kibra su dinamica y su creacion artistico. Hopi di nos escritornan por a probecha, den e forma aki, di su critica constructivo, pasobra nunca Wim tabata e juez supremo, pero mas tanto e amigo juez y e critico consehero.

Nos di Biblioteca Nacional ta orguyoso cu e nombramento di Wim como professor den ciencia di literatura y historia di literatura na Universidad di Antiya Hulandes. Esaki ta e culminacion logico di un carera largo dedica na e literatura di nos isla. E ta e coronacion di un trabao persistente, trahando cu entusiasmo riba tur cos cu ta regarda e literatura di Aruba, Antiya y demas paisnan den Caribe.

E nomber di Wim Rutgers, ta profundamente liga na Biblioteca pa su aporte na nos literatura. Wim, bo sa cu bo tin bo “plekje” den Arubiana. Nos ta warda bo. Wim, masha danki

 


Wim Rutgers (1941) ta entre otro critico literario, e ta haci investigacion y ta skirbi tocante historia di literatura principalmente riba tereno di literatura di Aruba, Antiyas y Surnam. Rutger tabata docente na Universidad. Awor e ta pensionado. Desde 1975 e ta biba y traha na Aruba. E ta casa, e ta tata y welo.
 

Wim Rutgers a traha hopi aña como docente despues di a caba su estudio na de Groen van Prinsterer-kweekschool na Doetinchem. Na 1971 el a haya su diploma bevoegdheid Nederlands MO-B na e Scol voor Taal- en Letterkunde na Den Haag. El a muda pa Surinam, caminda el a traha tambe como docente Hulandes.
Na Aruba el a duna les na Colegio Arubano, Instituto Pedagogico Arubano (IPA) y Universidad di Aruba (UvA). El a bira recensor na Amigoe di Curaçao', pa cual el a skirbi critica di literatura. Na 1989 el a logra su doctoral na e Universidad Utrecht riba ciencia di Literatura y despues el a promove na 1994 cu e proefschrift 'Schrijven is zilver, spreken is goud; oratuur, auratuur en literatuur van de Nederlandse Antillen en Aruba'. Na 1996 e publicacion 'Beneden en boven de wind' a sali riba mercado. Rutgers a skirbi hopi articulo riba literatura di Caribe cu a sali entre otro den Oso, De Gids, Ons Erfdeel, Callaloo en De Ware Tijd Literair. E ta co-autor di e metodo di literatura pa scolnan entremedio yama 'Kadans'. Sigui lesa mas......
http://nl.wikipedia.org/wiki/wim_rutgers





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn