Yolanda Croes

https://www.youtube.com/watch?feature=player_embedded&v=wSxbDN6_iNE

https://www.facebook.com/pages/My-Book-Corner-by-Yolanda-Croes/691241330990387


Autor Yolanda Croes cu novela nobo riba Mercado: “Unda Bo Ta Mami?”

Un storia basa riba realidad di bida tristo y dramatico di un muhe Arubiano y su dos yiunan

Un obra saca for di bida real cu ta conta e storia tristo di dos criatura cu ta wordo secuestra pa nan propio tata y hiba leu for di nan mama y leu for di nan tera. Pa añanan largo e muchanan ta lastra di porta pa porta, ta hui di un pais pa otro, cambiando shete scol den shete aña den un fuga largo y amargo, pa motibonan vengativo. Amistad, fiesta di mucha o e simple calor di un hogar ta cosnan cu e muchanan no a lanta cune den e añanan sin nan mama. Pero un fe grandi den Dios y un amor incondicional pa nan mama ta pone cu riba uin bon dia providencia mes ta haci cu e dos criaturanan ta haya nan caminda bek pa cas. Un storia yena cu emocion, caminda traicion, abuso verbal y hasta abuso sexual dentro di matrimonio ta hera kibra bida sano huicio di un hende muhe, pero den cual un amor insurpasabel y un fe indestructible cu den bida tin Uno mas grandi cu nos tur na mundo, ta pone cu finalmente bondad ta triumfa riba maldad.

Yolanda CroesYolanda Croes, den su estilo unico di skirbi y kende semper sa di conmove su lectornan cu su novelanan “ True stories” den nos dushi lenga Papiamento, e biaha aki ta conta nos na un manera franco y abierto di e bida turbulento di Maria, Joshua y Jotham; un famia Arubiano manera tin hopi aki riba nos isla chikito. Na prome bista hamas lo bo sospecha tanto tristesa y tanto lagrima den curason di tres prohimo asina devoto y humilde. Pero apariencia a gaña y den caso di Maria, henter su bida matrimonial tabata un mentira largo y doloroso. Lanta como mucha inocente den un bario durmiente patras na Savaneta, e tabata preti wowo di su tata y no tabata conoce nada otro cu felicidad den un hogar bastante proteha. Bibando segun scrituranan estricto di Jehova y manteniendo su mes na e leynan moral severo di e generacionnan di antes, tata di Maria a cria su yiu muhenan sera den cas pa asina, cu frenta na laira, e por entrega nan un pa un intacto y como señorita fini na nan futuro esposonan. “ Yiu muhe ta pa cuida”, tabata su lema sagrado, pasobra “…yiu homber por cai den lodo y sali limpi bek, pero un yiu muhe ta keda desgracia pa resto di su bida.” Maske cu Maria nunca no por compronde e dicho hopi usa aki den nan cas, tog semper el a obedece su mayornan manera yiu bon cria. Pero gana di sali for bou di e yugo di su cas maternal sigur Maria tabatin y esaki tabata loke a pone cu el a dal aden cu e prome homber cu a crusa su caminda. Di un banda Maria tabatin un anshia pa purba e miel dushi cu ta emana for di un matrimonio, cu tabata sisti solamente den su imaginacion infantile. Di otro banda, e mucha muhe cabei largo preto tabata anhela mas cu tur cos di tin su libertad y di tin su propio hogar. Ya cu su religion ta considera fornicasion fuera di matrimonio un pica mortal, riba cual tin hasta castigo di scomulgacion for di e religion, a haci cu Maria tabatin mas pura pa casa ainda. Mas cu tur cos, e tabata kier a sa pa su mes kico kiermen pa ta un muhe completo. Pero tog…., Maria tabatin su dudanan fuerte. Di otro banda su mayornan tabata presione pa busca un casamento pa caba ya cu e tabata birando muhe bieu den cas y nan temor pa nan preti wowo peca den wowo di Dios, tabatin nan nervionan na werki. E mucha homber sinembargo, no tabata di su mes raza, ni di su mes cultura. Ni nan idioma no tabata similar, sino solamente nan religion, loke a carga aprobacion final di su mayornan. Di modo cu Maria, na comienso di añanan setenta, di puro miedo di keda den cas manera un piedra di fogon, a casa na edad di 22 aña cu un persona cu di baina e tabata conoce drechi. Kico a pasa cu Maria? Con su bida a sigui? Kiko a conduci na e secuestro cruel y con su yiunan a sobrevivi e temporada sin e amor y calor di nan mama cu nan tabata adora?

Yolanda Croes (right)Tur esaki bo por lesa den e bukinobo di Yolanda Croes, autor di e novela cu a conkista cada un riba nos isla y den Antiyas henter: “Acompaña Pa un Angel : E Tragedia Di Buelo 2000”. For di man di Yolanda Croes a keda publica tambe e obra: “Perdi Riba Lama”, den cua piscadornan Arubiano ta conta nan odiseo riba lama. E obra literario “Unda Bo Ta Mami” ta hiba un prologo di Prome Dama di Aruba, sra. Dora Koolman-Croes, alabes dama protectora di e Fundacion di Hende Muhe den Dificultad, na cual fundacion Yolanda ta ofrece parti di fundonan recobra di benta di e buki aki. Cumprando su buki, bo ta aporta alabes na un bon causa, apoyando loke ta di nos propio suelo y contribuyendo na yuda nos sernan femenino cu ta pasando, na momento cu ta lesando esaki, den un grado of otro, den e mesun dolor cu Maria. Unda Bo Ta Mami lo ta na benta pronto den tur bario; den tur libreria y cerca e autor mes na su Scol di Idioma na Piedra Plat 89-B. Prijs di e buki ta 35 florin. Yama 585-7131 pa reserva esun dibo. Tur buki reserva adelanta, lo ta firma pa e autor. Yolanda Croes ta publica su bukinan bou di maneho propio. Un danki ta bai na tur cu di un forma of otro a aporta na  realisacion di e buki aki. Unda bo ta mami ta un producto local completo cu ta wordo imprenta aki na Aruba mes na VAD Printers. Portada ta diseño di ruman mas chikito di e autor, Maybeline Ungar-Croes, kende ta diseño grafico. Potret di e autor ta di Checkpoint color. Make-up artist ta e conocido talento local Rossini van Wijk.

Fuente: Corant: Bon Dia Aruba, p. B12, Fecha: 5 di November 2001


Perdi riba lama : storianan di piscadonan cu a yega di perde riba lama y a sobrevivi pa por conta nos nan odisea

Piscadonan Arubiano ta rebiba momentonan di angustia perdi riba lama. Cada storia ta un les di bida pa nos siña di dje: Buchi Panama ta un hoben prufia cu a subi lama hunto cu dos otro amigo buscando aventura, pero na caminda nan audacia hubenil a hera costa tur di nan, nan bida. Buchi Everaldo ta un piscado disciplina, cu un pasion inmenso pa lama.

Su piscamento ta forma parti di e bida diario di su famia y e ta pone su porta di cas riba un scref, di moda cu e lector por tira un bista paden y sera conoci cu e Aruba den añanan 50 y 60. Un presentimento straño di su yui homber, ta cambia rumbo di un destino fatal.

Finalmente, e rescate milagroso di cuater amigo, kendenan segun nan fiel creencia tabata nan cinco dia cu nan boto a bolter den lama feroso riba Cabes di Ruba. Esun di cinco a compaña nan y a pone Angelnan Guardian bou nan pia den e anochi scur y spantoso, ora nan tabata bringa pa nan bida den e awanan di tribon. . .


Unda bo ta mami : un storia di fe, speransa y amor

 

Joshua y Jotham, na edad di 11 y 14 aña, despues cu e matrimonio violento di nan mayornan a culmina den divorcio, ta wordo secuestra pa na tata y hiba Merca.

Añanan di inquietud y inseguridad ta warda nan den un pais duro y desconoci. Nan mama ta keda bandona atras sin sa paradero di su yuinan, sin sa si nan ta bibo of morto. Shete aña despues sinembargo, su suerte ta bolter y un mensahe inespera ta cambia su bida. Un storia yen di tristesa, pero den cual ta resalta determinacion firme y un amor di un yui pa su mama asina grandi y profundo, cu finalmente ta loke ta guia e dos criaturanan den nan anshia pa haya nan caminda bek pa cas.


Acompaña pa un angel : e tragedia di buelo 2000

 

Ocho prohimo a sali rumbo pa Punto Fijo un dia mainta tempran. Tur cu un meta diferente: un pareha hoben hibando nan yiu chikito doctor pa recobra su salud; otro pareha recien casa pa hiba regalo pa nan amigonan y pa keiro; un turista hoben pa satisface su curiosidad y pa djis dal un paseo di un par di ora na un tera desconoci; un tata den flor di su bida regresando cas cerca su casa y su yiunan y e hoben piloto haciendo su trabou di tur dia. Pero caminda nan tur a topa un solo destino… 

Mas informacion di Sra. Yolanda Croes

http://ondernemenophakken.nl/2013/08/yolanda-croes/ 

http://scoldiidioma.org/staff.html





Biblioteca Nacional Aruba
George Madurostraat 13
Oranjestad Aruba
Phone +297 582-1580
Fax +297 582-5493
www.bibliotecanacional.aw
info@bibliotecanacional.aw

Branch San Nicolas
Peter Stuyvesantstraat z/n
San Nicolas Aruba
Phone +297 584-5277 /
+297 584-3939
Fax +297 584-5004


Dept. Arubiana/Caribiana
Bachstraat 5
Oranjestad Aruba
Phone +297 582-6924

Facebook   Google+ YouTube Pinterest LinkedIn