‘Amigonan tur caminda’ pa gobernador

November 2, 2018

Awemainta directora di Biblioteca Nacional Aruba, sra. Astrid Britten, hunto cu sra. Lilian Semeleer, sra. Yosmar Sneek y sr. Jeroen Hoogerwerf a bishita gobernador di Aruba, su excelencia sr. Alfonso Boekhoudt. Motibo di e bishita tabata pa entrega e ‘Regalo di Festival di Buki pa Mucha’ na gobernador.

E ‘Regalo di siman di Buki pa Mucha 2018’ ta un regalo pa muchanan di Aruba. Por haya e buki gratuitamente na tur libreria ora cumpra un buki pa mucha, tanten cu tin.
Biblioteca Nacional Aruba ta contento y orguyoso di por presenta e buki di Festival di Buki pa Mucha. E buki titula ‘Amgo tur caminda’ ‘Overal vrienden’ ta na Papiamento y Hulandes . Esaki ta un compilacion di storia di diferente escritor di storia pa mucha. Traduccion tabata na encargo di sra. Lilian Semeleer y Angelique Maduro y redaccion di Jeroen Hoogerwerf. E buki a keda publica na Levendig Uitgever.

Tur aña Biblioteca Nacional Aruba ta produci un publicacion pa su Festival di Buki pa Mucha. Cada aña tin un tema cu ta e guia pa e autor y ilustrado. Na 2018 e tema ta ‘Amistad’.
E aña aki Biblioteca Nacional Aruba ta publica un compilacion di storia di escritor di Aruba, Corsou, Boneiro, Caribe y Hulanda. Storia pa mucha den categoria di edad di 4 pa 12 aña. Esaki ta un produccion na dos idioma, Hulandes y Papiamento. Biblioteca Nacional ta gradici tur escritor pa nan bunita contribucion. Y un danki grandi na e ilustrador di e buki ‘Amigo tur caminda’, artista visual Vanessa Paulina.

 

Scroll To Top

Newsletter