Amistad! Traha storia hunto…
12/06/2018
Actividadnan di Festival di Buki pa Mucha 2018 lo ta den luz di e tema ‘Amistad’. Pa comunica e tema bon cla na tur scol y mucha ta scohe un lema cada aña. E aña aki e lema ta ‘Amistad! Traha storia hunto…
Esaki ta un tema cu por haci hopi cu ne y biblioteca ta pidi tur hende cu ta traha cu mucha pa ta creativo den duna contenido na e tema. E tema sigur ta reconocibel pa un y tur. Nos ta disfruta di amistad y nos amistadnan ta parti di nos storia. Tin ora tin problema den amistad pero nos mester amistad, realidad di bida. Pesey ta celebra amistad e aña aki.
Inspiracion pa haci algo cu e tema tin hopi y biblioteca lo duna tayer tambe na maestronan di scol basico con pa traha cu e tema aki den buki, contamento di storia y otro expresion. E ta un tema cu nos ta topa cu ne hopi den buki pa hubentud pasobra cera amistad ta algo cu bo ta siña como mucha. Tayernan lo tuma lugar den siman di 17 pa 20 di september 2018.
Na Aruba ta sigui e tema cu Stichting CPNB na Hulanda ta stipula pero ta dune un toke crioyo y ta invita autor y ilustrador di region Caribe y otro parti di mundo. Biblioteca Nacional Aruba ta tene un y tur na haltura di e desaroyonan den organisacion di e festival grandi.
• Tayernan pa maestro ta den siman di 17 te cu 20 di september
• Apertura di e festival ta diabierna dia 2 di november.
• Bishitanan di scol lo ta den siman di 5 pa 9 di november
• Actividadnan di atardi pa mucha ta di 5 pa 8 di november (merdia di 3or pa 4or) na biblioteca.
Persona di contacto ta: sra. Yosmar Sneek y sra. Sophiene Maduro y sra. Lilian Semeleer (tel. 582 1580)
Scroll To Top