Biblioteca habri diadomingo awor
03/07/2019
Diadomingo awor, dia 7 di juli 2019 biblioteca na Playa ta habri for di 11or di mainta te cu 8or di anochi y ta invita tur famia pa pasa bishita biblioteca. Esaki especialmente pa duna comunidad e oportunidad pa entrega tur buki cu a fia. Biblioteca Nacional Aruba ta pidi tur studiante cu a fia buki pa entrega esakinan bek. Muy en especial e studiantenan cu a pasa examen y cu a gradua of a caba scol. Entrega di buki por sin paga boet.
Ademas lo tin e evento Aruba Maker Expo na biblioteca na Playa. Esaki ta un evento gratis di fin di aña escolar 2018-2019 pa mucha, hoben y adulto pa celebra un aña cu Mo-B Lab hunto cu mas di 40 ‘makers’ y nan proyectonan di arte, ciencia y tecnologia. Ta invita pueblo henter pa ta parti di esaki y pasa biblioteca dia 7 di Juli entre 11or di mainta y 8or di anochi. E Aruba Maker expo ta un celebracion di un dinamica di innovacion y experimentacion na Aruba.