Biblioteca pa baby y chikitin tambe
25/05/2021
Lesamento of miho bisa e goso den lesamento ta nace na cas. Hopi mayor ta kere cu lesamento ta cuminsa na scol, pero realmente lesamento ta cuminsa mas trempan. Por cuminsa lesa/papia cu e baby ora e ta den barica ainda!
Wak un buki hunto cu bo baby por zona straño, pero e ta un bon comienso. Un comienso di hopi aña pa comparti cu otro den un dushi ambiente. Ya desde 4 luna por laga un baby cera conoci cu buki, plachi, palabra, zonido. Si un mucha lanta den un ambiente caminda buki y lesamento ta forma parti di e bida diario, e lo sinti un atraccion pa lesamento mas despues.
Un baby ta demostra interes pa plachi y e bos di su mayornan cu ta conta un cuenta. Cu hopi interes nan por keda wak diferente imagen. Por stimula mucha pa lesa for di chikito caba door di lesa pa nan. E miho manera ta pa cuminsa lesa pa un baby y sigui cu e custumber aki. Un mucha ta wak su mayor- y rumannan lesa y sa cu esey ta algo dushi pa haci. E simiya ta wordo planta na cas. Kiermen cu den e ambiente di cas e goso ta lanta y ta sigui crece.
Hopi hende ta kere cu un mucha por cuminsa bishita biblioteca dia cu e cuminsa bay scol. Pero esey no ta berdad. Por bishita biblioteca for di 0 aña caba pasobra biblioteca tin buki den su coleccion cu por usa pa lesa pa baby, chikitin y kleuters. Tin buki pa chikitin cu tin hopi ilustracion simpel, cla y alegre cu un baby of chikitin por interpreta bon asina poco poco captando diferente imagen y storia.
Baby por cuminsa hunga cu buki di plastic, despues si e ta un poco mas grandi, buki di tela of buki di carton duro. Despues por cuminsa cu buki di prenchi.
Chikitin
Con ta stimula interes pa buki cerca un chikitin? Algun sugerencia:
Tema: Busca buki di cosnan cu e ta gusta. Por ehempel, e ta gusta bestia?, Auto? Pero lag’e mes scoge tambe. Si e storia ta mucho largo salta un pida.
Ripiticion: Keda lesa storianan bunita di nobo. Mucha chikito ta gusta scucha un storia atrobe. Tambe e ta hasie familiar cu e manera con e storia ta hinca den otro. Interactivo: Durante lesamento para un rato, puntra e mucha con e ta kere cu e storia ta bay caba y hasi mas pregunta. Haci pregunta riba e plachinan cu e ta mira. Laga e mucha bisa bo e colornan cu e ta wak. Kisas por laga e mucha pinta loke el a scucha.
Buki ta habri porta pa un mundo di storia, fantasia y bunita imagen.
Scroll To Top