biblioteca San Nicolas na bo ordo

25/03/2019

Biblioteca Nacional Aruba tabatin un brindis siman pasa pa celebra cu e renobacion di sucursal San Nicolas a keda finalisa y comunidad di San Nicolas por bishita nan biblioteca atrobe manera custumber.

A tuma mas o menos un aña pa renoba e edificio di biblioteca na San Nicolas. Biblioteca a muda bek december ultimo. Pa duna atencion na e echo aki y gradici tur compania y persona cu a coopera cu e proyecto grandi aki a organisa un reapertura. Esaki a bay den forma di un brindis cu un programa special pa empleado y invitadonan. Minister di Enseñansa, Ciencia y Desaroyo Sostenibel, sr. A. R. Lampe, Minister President sra. Evelien Wever-Croes, Vice presidente di Parlamento, sr. Alan Howell, amigonan di biblioteca y miembronan di prensa a honra cu nan bishita. Sr. Gregory Richardson a guia e programa di e anochi festivo cu bunita palabra, declamacion di un poema y expresion di speransa pa biblioteca sigui di ta un inspiracion pa miembronan di comunidad di San Nicolas y un lugar pa lesa y siña. Oradornan a conta kico biblioteca di San Nicolas a nifica pa nan y un poco di nan bon recuerdonan pasando tempo na biblioteca. Un centro pa busca informacion y tambe pa topa otro. Biblioteca Nacional Aruba su departamento Audiovisual a presenta 3 info-docu cu sr. Tito Bolivar (AAF), sr. Leo Bèrènos (amante di historia) y sr. Judith Ling, coordinadora di biblioteca San Nicolas.

E facilidad ta opera optimal atrobe, lift ta trahando, un reparacion a tuma lugar, edificio a haya un bachi nobo y e airco ta trahando bon. Tin computer na disponibilidad di un y tur, un departamento Hubenil cu tin actividad pa mucha tur diaranson atardi 3or y un coleccion grandi di buki pa mucha. Den coleccion di adulto tin un cantidad di buki nobo, hopi atractivo.

Gerente di Biblioteca Nacional Aruba ta spera cu tur miembro y bishitante ta sigui haci uso di e servicio di biblioteca di comunidad SN y lo keda haci uso di e servicio pa comunidad.

Scroll To Top

Newsletter