Bijbel di prenchi
05/09/2019
Directora di Biblioteca Nacional Aruba, sra Astrid Britten, a ricibi un ehemplar di e ‘Bijbel di prenchi’. Esaki ta un publicacion di Sosiedat di Beibel den Karibe Hulandes y ilustracion y diseño grafico ta di Marijke ten Cate. E buki aki ta un coleccion di storia pa mucha di testament bieu y nobo y ta un traduccion di ‘Prentenbijbel: verhalen uit het Oude en Nieuwe testament’ (version original). Minister Rudy Lampe a felicita e traductornan pa cu e proyecto exitoso aki durante e presentacion oficial di Bijbel di Prenchi na Cas di Cultura. Traductornan y revisadornan di Aruba cu a duna nan aporte pa e version di Papiamento di Aruba ta sra. Swinda Maduro-Schwengle y sra. Selvia Lumenier.
Minister Armando Rudy Lampe a enfatisa e importancia di ‘Bijbel di Prenchi’ na Papiamento mirando cu pa e aña escolar aki lo cuminsa cu e scol Arubano Multilingual cual ta haci Papiamento idioma di instruccion cuminsando cu e prome aña.
E bijbel di prenchi ta pa mucha di 4 pa 7 aña di edad. For di 6 aña e muchanan por lesa e storianan nan mes. Bijbel di Prenchi ta skirbi specialmente pa muchanan pero ta atractivo tambe hendenan di tur edad ya cu e texto ta bin cu imagennan bunita, colorido y bibo. E ta apto tambe pa lees voor pa gruponan di mucha y na mes un momento combersa riba e diferente temanan cu ta bin dilanti.
Scroll To Top