Bishita pa nos grandinan

02/07/2019

Un bes mas a clausura un exitoso edicion di e proyecto anual ‘Conta cuenta na Casnan di nos Grandinan’. Empleadonan di biblioteca ta sali bay tur aña pa entretene cuidadanonan cu no por bay biblioteca mas. Pa conta cuenta, presenta obra teatral, canta y toca musica, esaki hunto cu contador di storia, autor, poeta of actriz. Nan ta bishita e diferente casnan di nos grandinan pa presenta un progama di un ora. E obra teatral cortico tabata un storia di un famia Arubiano den añanan ochenta tocante bon moral. Tambe a presenta baile di ‘Dera Gay’.

E biaha aki e gira tabata cu sra. Titi Tromp, Baluarte di Alto Vista, Shi Preke (sra. Lilian Besselink) y comediante sr. Henry Hernandez. E proyecto tin duracion di 3 luna. Di e manera aki biblioteca ta contribui na presenta actividadnan alegre y informativo pa nos grandinan cu ta biba den e diferente Cas pa Anciano manera e.o. Paviljoen San Pedro, Huize Maris Stella Savaneta, SABA San Nicolas y Cas Marie Savaneta. Na total tin 12 bishita. Coordinacion di e proyecto ‘Conta Cuenta Na Casnan di Anciano’ ta den man di un bibliotecaria y Quota Club Aruba ta ofrece un contribucion financiero pa cubri algun gasto. Monumentenbureau tambe a duna su contribucion. Un danki special na tur cu ta contribui na e proyecto aki den un of otro forma.

Scroll To Top

Newsletter