Bista Adapta di Frank Williams

23/02/2018

Diaranson awor, dia 2 di December, tin presentacion di e buki titula: “Bista Adapta: Biahamento ta hancha e curason” skirbi pa autor y contador di storia sr. Franklin A. Williams. Esaki ta tuma lugar na Biblioteca Nacional Aruba situa den George Madurostraat pa 7’or y mey di anochi.

“Bista Adapta” ta un coleccion di 8 cuenta y relato basa riba observacion. Observacion ta crea cantidad di impresion, cu e autor ta almacena den su mente. Impresionnan ta stimula su inspiracion y su inspiracion a resulta den e coleccion di cuenta y relato aki. Ta como sifuera su inspiracion a drenta den almacen di su mente y a core sali cu un botin di cuenta y relato. Primordialmente e buki aki ta pa diberticion di e lesado, aunke cu aki-aya e cuentanan no ta laga di tin un tenor skerpi of critico. E buki ta dedica na Frank Williams su amigonan, Yubi Toppenberg, Boy Escalona y Delwin Gomez. Diseño di e portada ta di sra. Rhona Lemminga.

Tur hende ta keda cordialmente invita pa presentacion di e buki: “Bista adapta”. E buki aki ta su di 11 (diesun) publicacion. Frank Williams ta trahando riba dos otro produccion actualmente y ta spera di presenta nan (of a lo menos un di nan) e aña benidero. E buki ta na benta e anochi di presentacion y despues lo ta disponibel na libreria. Na final di e anochi e autor lo firma su buki. Un y tur ta bon bini.

Scroll To Top

Newsletter