Catalogo di Pintura di Indjan riba baranca

23/01/2019

Despues di algun decada di trabou, un catalogo cu ta contene e imagennan di mas di 400 pintura riba baranca na Aruba, lo wordo publica e aña aki. Fundacion 1403 a guia e financiamento y e produccion di e buki aki cual lo ta e di 16 den e serie di publicacionnan di Museo Arqueologico Nacional Aruba (MANA).

E pinturanan Indjan riba baranca ta un parti importante di nos herencia cultural y un fuente di inspiracion pa artista y otro mentenan creativo den nos comunidad. E catalogo lo duna publico general y e comunidad cientifico un bista di e rikesa di e herencia aki, na mes momento cu e ta fungi como un instrumento pa nan conservacion y preservacion. E catalogo ta un rekisito importante tambe den e proceso pa yega na un nominacion riba e lista di herencia mundial di UNESCO.

Banda di su formato y contenido atractivo, e publicacion di un manera innovativo ta presenta e puntonan di bista diferente di e dos autornan, e arkeologonan dr. Aad Versteeg  y drs. Harold Kelly . E arkeologo di MANA Harold Kelly a accepta e reto di ta parti di e publicacion cu a ser inicia pa dr. Versteeg, kende ta hopi conoci na Aruba pa su trabounan di investigacion arkeologico den colaboracion cu MANA na e.o. Malmok y Tanki Flip.  E perspectiva cientifico di drs. Kelly ta diferencia di esun di su colega, dunando e publicacion un angulo dinamico y sosteniendo e pensamento cu mester pone prioridad pa promove mas investigacion cientifico di nos herencia arkeologico.

Prins Bernhard Cultuurfonds Caribisch Gebied y UNOCA a financia gran parti di e publicacion, sigurando asina cu nos comunidad y bishitantenan por conoce e rikesa arkeologico di nos isla. Fundacion 1403 ta masha agradecido tambe na Vertegenwoordiging van Nederland in Oranjestad, Gomez Coffie y FCCA cualnan a duna un aporte.

Esnan interesa pa haya sa mas di e publicacion aki por bishita e pagina di Facebook di Fundacion 1403.

 

Scroll To Top

Newsletter