Caya di Monche

November 22, 2018

Diahuebs 29 di november pa 7:30 pm lo tuma luga e presentacion di e buki ‘E Caya di Monche’ di e autor Benjamin Romero na Biblioteca Nacional Aruba na Playa.

Durante lesamento di ‘E Caya di Monche’ e lector lo descubri tres componente clave: biografico, historico y genealogico, esta di historia di famia. E Caya di Monche ta conta un etapa di e bida di e papiamentista Ramon Todd Dandaré, tempo di su infancia y hubentud den Elleboogstraat. Tambe e ta relata, entre otro, su formacion como academico y linguista, sigui pa su experticio den nos lenga materno.

E autor a hinca e biografia aki den un contexto historico defini, rescatando echo y personahe fo’i den e bahul di olvido. Contrario na ‘E Negoshi di Koffie na Aruba’, e prome obra di e autor aki, e obra ‘E Caya di Monche’ ta menos periodistico y mas literario.

E ta describi e comunidad singular cu a biba den Elleboogstraat entre 1940 y 1965. Nan a comparti cu otro no solamente nan idioma, sino tambe nan cultura, tradicion, custumber, gastronomia etc. E tin di haber cu presencia di e prome ola di inmigrante Latino Americano cu a bin establece na Aruba. Tambe di otro nacionalidad cu a convivi den e caya marginal aki localisa den pleno curason di Playa.

Scroll To Top

Newsletter