Corant digitalisa

BNA – Biblioteca Nacional Aruba

Biblioteca Nacional Aruba ta duna aceso na un parti di su coleccion pa medio di un archivo digital. Esaki ta un biblioteca digital cu ta ofrece aceso liber na studiante, bishitante en busca di informacion, investigadornan. Meta ta pa duna aceso na un y tur.

Empleadonan di departamento Arubiana-Caribiana di Biblioteca Nacional Aruba a digitalisa diferente items interesante pa publico general por wak. Interesadonan por wak e coleccion for di cas mes, ta trata potret y documento, corant, revista, tesis, y diferente otro publicacion cu ta forma parti di e coleccion nacional. Dia 7 di maart ta lansa e coleccion aki oficial. Esaki ta tuma lugar na departamento Arubiana-Caribiana, ubica na Bachstraat 5, Oranjestad. Riba programa tin tres orador cu lo papia riba temanan manera herencia documental, preserva informacion historico y cultural, digitalisacion duradero y aceso na informacion. Oradornan ta drs. Peter Scholing (Biblioteca Nacional Aruba), drs. Raymond Hernandez (Archivo Nacional Aruba) y sr. Renwick Heronimo MA (Fundacion Museo Arubano).

Cu e lansamento di e coleccion digital un parti di e coleccion nacional documental y audiovisual di Aruba ta bira mas visibel pa mundo henter. Tambe di e manera aki ta lanta mas interes pa loke tur e coleccion tin di ofrece.

Un invitacion ta bay pa comunidad pa diahuebs dia 7 di maart 7:30pm den cura di departamento Arubiana-Caribiana, Bachstraat 5, Oranjestad. Pa pregunta of mas informacion por tuma contacto na 582-6924 of via email: digital@bibliotecanacional.aw

 


The Digital Library of the Caribbean (dLOC)
Por consulta corant online

Dept. Arubiana ta trahando riba e digitalisacion di 3 corant cu tabata den circulacion den siglo pasa pa algun aña. Ta trata di ‘Observador: semanario informativo netamente Arubiano’ dedica na interes di pueblo di Aruba, ‘Aruba : noticiero oficial di Gobierno (Insular)’ y ‘Aruba: orgaan van de Voorlichtingsdienst van het eilandgebied Aruba. Ta trata di e añanan 1957 pa 1984.

Un bibliotecaria di Dept. Arubiana a scan pagina pa pagina di e publicacionnan aki pa por haci nan acesibel online. E publicacionnan ta duna informacion historico di Aruba y por sirbi pa investigacion. Observador a keda publica pa di prome biaha na 1935. Despues el a sali atrobe riba mercado di 1961 pa 1965. E tabata na Papiamento y un dado momento tabata tin un seccion tambe na Ingles. E tabata un publicacion na interes di un y tur y e tabata duna un poco atencion tambe na e bida cultural na Aruba. Aruba: noticiero oficial di Gobierno (Insular) tabata un publicacion di gobierno pa informa pueblo tocante e diferente trabou y proyectonan di gobierno.

Un gran parti di e trabou di scan ta cla, dentro di poco tur publicacion lo ta disponibel online. Por yega na e publicacionnan aki via e website di The Digital Library of the Caribbean (dLOC), http://www.dloc.com. [Riba e ‘home page’ por click riba ‘partners’ despues bay pa ‘Biblioteca Nacional Aruba’ y primi riba e tab ‘all items’]

Personanan cu ta busca articulo y tambe anuncio y potret di Aruba di e periodo 1943 te 1985 por haya esaki pa medio di e mesun website. Pa algun tempo caba por busca den aproximadamente 837 issues riba e website aki. E digitalisacion di Aruba Esso News y e otro 3 publicacionnan ya menciona ta un cooperacion di Biblioteca Nacional Aruba y The Digital Library of the Caribbean. Aruba Esso News den siglo pasa tabata un corant conoci na Aruba y specialmente den e comunidad di Lago.

The Digital Library of the Caribbean (dLOC) ta un cooperativa di biblioteca digital di recursonan relaciona cu e cuenca di Caribe. dLOC ta ofrece acceso na versionnan digitalisa di material cultural, historico y di investigacion tocante Caribe, cu actualmente ta warda den archivonan, bibliotecanan y coleccionnan priva.


Amigoe den coleccion digital di Koninklijke Bibliotheek
Investigadornan en busca di informacion y noticia di siglo pasa di Corsou y e otro islanan por consulta Amigoe online. Amigoe, The Curaçao Gazette of de Curaçaose Courant ta accesibel. Por busca den mas o menos 1500 corant for di Hulanda, Antiyanan Hulandes, Surinam y Nederlands-Indië pa medio di un variedad di palabranan clave. Ta trata di mas cu un par di miyon di pagina di e periodo 1618 te cu 1995. E digitalisacion aki ta un iniciativa di Koninklijke Bibliotheek na Hulanda.


Dos representante di e compania Hulandes, KARMAC a entrega corantnan digitalisa for di e microfilms cu nan a produci pa Biblioteca Nacional Aruba (BNA). E proceso di produci microfilms a sosode na 2004, tempo cu  BNA a manda e corantnan ‘El Despertador’ y ‘Arubaansche Courant’ (1953-1967) pa KARMAC na Hulanda. Awor nan a digitalisa e microfilms cu nan tabatin warda. E dos representantenan di KARMAC ta sra. Nadine Jongeneelen Swaan y sr. Ran Siderius.

Esaki tabata un proyecto hunto cu Koninklijke Bibliotheek cu fondo di Participation Programme di UNESCO. E represenantenan di KARMAC a entrega un hardrive na sra. Des Croes y sr. Peter Scholing di Dept. Arubiana.

Dept. Arubiana ta den palabracion cu Koninklijk bibliotheek (KB) pa inclui e corantnan den Delpher, e databank online di KB. Pero tin mas opcion. E siguiente pasonan ta pa pone nan disponibel online mas lihe cu ta posibel.


Bron: Amigoe, dinsdag 19 februari 2019

Scroll To Top

Newsletter