Curso cortico Non-fiction writing

20/12/2018

Biblioteca Nacional Aruba ta ofrece un curso cortico Non-fiction writing di e genero ‘Activismo’. Esaki ta cuminsa dialuna dia 7 di januari pa 5or. Tin 6 sesion. Coach pa e curso aki ta Luis Villegas.

E curso aki ta pa esnan interesa pa expresa nan mes por escrito tocante cualkier tema di preocupacion den comunidad y tambe e sentimentonan pa cu e tema escohi. Registracion por via email pqpqlv@gmail.com of whassapp 746 0129, e curso ta costa 75 florin pa persona. (Fechanan ta dia 7, 11, 14, 21 y 28 di januari y ultimo session dia 1 di februari, tur 5or pa 7or)

E idea cu e workshop aki ta pa yuda personanan cu lo kier expresa algo cu nan ta haya importante. Esaki ta bin pasobra hopi biaha na Aruba tin un ‘Cultura di Miedo’ unda ta evadi papia di problemanan cu ta surgi, cu poco biaha ta yega den noticia of no ta haya mucho atencion ora e si yega den noticia.
Cuanto hoben por ehempel a dicidi di tuma nan propio bida e ultimo añanan, pa despues laga e problema cay sin cuminsa haci un sondeo of bay mas profundo riba e problema? Mescos por bisa di problemanan manera violencia domestico y abuso (sexual) di mucha.

Sea por medio di e participante su propio experiencia of esun di un conocido participantenan lo siña con pa conduci investigacionnan periodistico riba topiconan cu ta toca nos comunidad cada dia, pero cu poco biaha ta haya e trato profundo cu lo por trece un impacto.

E investigacionnan lo ta basa riba conduci entrevista cu individualnan y tambe instancianan. Pero no ta solamente e parti investigativo cu lo haya atencion, pasobra lo conecta e documentacion tambe cu produccion di arte contemporaneo den diferente forma. Pues den e workshop
participantenan lo haya un introduccion na dibuho y fotografia basico pa transmiti un mensahe por medio di simbolo y metafora, cual lo envolvi comunicacion visual.

Na final e meta ta pa produci un publicacion cu lo tin material di e proceso y resultado final di cada participante cual lo sirbi como e testimonio di loke a tuma luga den e workshop. E publicacion aki lo ta disponibel riba medionan digital y tambe lo imprimi esaki.

Luis Villegas tin mas cu 1 aña di experencia trahando como periodista na matutino Bon Dia Aruba, pero ya prome cu esaki el a bay afo pa representa Aruba na Argentina como investigado artistico danki na aporte di Unoca. Na Argentina el a documenta e storianan di migrante hoben cu ta identifica nan mes como ciudadano di Aruba maske proceduranan gubernamental ta laga nan sin por haya nan nacionalidad Hulandes den tempo rasonabel.

Scroll To Top

Newsletter