Denis Henriquez
23/02/2018
Denis Henriquez a publica dos obra nobo, coleccionnan di poesia titula “Lenga di mi Mama” y “Aruban Landscapes”. E ultimo ta contene poema prosa na Ingles.
“‘Lenga di mi Mama’ y ‘Aruban Landscapes’ ta dos obra cu e keda drumi durante hopi aña como files den mi computer. De bes en cuando mi tabata repasa y edita e texto, cambia algo aki, kita algo aya. Aña pasa mi a dicidi di stroba nan soño dor di laga mi amigo Wim Rutgers tira un bista riba. Ta e a conseha mi pa sigui traha riba un publicacion. Di un cos a bini otro y awe e dos compañenan a materialisa den forma tangibel di dos buki.”
Denis Henriquez (’45) ta bon conoci den mundo literario di reino. Algun obranan cu por menciona di Denis ta e.o.: Ariba tereno di teatro: Mayan Dalia lo ta mi Dalia (1978), Fenchi a gana premio mayo (1981), The Mad T-party (1983) y E sonjo di Alica (1988). Den ramo di poesia: Kas Pabow (1988) y pa locual ta trata novela: Zuidstraat (1992), Delft Blues (1995) y De zomer van Alejandro Bulos (1999).
Den Sala Arubiana bo por haya un map cu recorte di corant y diferente articulonan tocante e autor Sr. Denis Henriquez y su obranan. Por lesa tambe un scriptie di Pieter Visser titula: Leven en werk van Denis Henriquez. Mas informacion di Henriquez por lesa den:
Cosecha Arubiano; un antalogia
Beneden en boven de wind / Wim Rutgers
Pa saka cara, tomo III
Schrijven is zilver, spreken is goud / Wim Rutgers
http://nl.wikipedia.org/wiki/Denis_Henriquez
http://www.bibliotecanacional.aw/pa/denis-henriquez/64
Introduccion di Des Croes:
Pa añanan largo tabata keto rond di Denis Henriquez, e escritor y docente di fisica y matematica Arubiano, biba na Hulanda. E tabata keto riba tereno literario, en todo caso e no tabata publica. Anto esaki pa un hende cu tabata skirbi for di tempo e ta na scol secundario. E tabata miembro di redaccion di e schoolkrant y tabata skirbi den su diarionan cu no tabata destina pa publicacion.
Despues di su estudio na Hulanda, el a gradua como fisico teorico na Universidad di Leiden, el a traha como docente di fisica na Colegio Arubano. E tempo ey e tabata skirbi textonan pa cabaret pa e asociacion di docentenan na Aruba. E contenido di e textonan y canticanan tabata critico politico. El a skirbi diferente obra di teatro manera ‘Mayan Dalia lo ta mi Dalia’ y ‘Fenchi a gana premio mayo’. Na 1988 Editorial Charuba a publica 2 buki di Denis, e obra di teatro ‘E soño di Alicia’ y un coleccion di poesia ‘Kas pabow’. Denis a traha tambe na e filmscript ‘Dera Gai’, cu tabata un coproduccion di Tele Aruba y NOS. Despues a sigui tres novela na Hulandes: ‘Zuidstraat’ na 1992, ‘Delft blues’ na 1995 y ‘De zomer van Alejandro Bulos’ na 1999.
Despues di esey a bira keto……
Ultimo añanan, despues cu el a stop di traha, Denis y su señora Gerlene ta pasa tur aña e temporada di winter na Aruba. Un di e biahanan ey mi a puntr’e si e no ta haci nada mas riba tereno literario. El a conta mi cu e ta mas tanto profundisando su mes riba e tereno di fisico teorico. E tabata sigui charlanan y debatenan online.
Tabata un sorpresa agradabel ora cu tog un dia el a conta cu e tin un coleccion di poesia cla pa publica ‘Lenga di mi mama’. Bunita tabata cu por a combina e publicacion aki cu un otro publicacion cu ta un coleccion di storianan cortico na Ingles, anto cu ilustracion di Denis himself! Mas bunita tabata cu Unoca mesora a mustra interes pa yuda cu e publicacionnan cu a mira luz di dia na 2014.
E escritor Denis Henriquez ta bek.Cu boso Denis Henriquez.
Speech Denis Henriquez Event April 21, 2015
E ta esencial pa nos comunidad por gosa di contribucionnan literario den nos propio idioma. Nos ta un pueblo, un comunidad cu ta creciendo constantemente y ta cambiando constantemente, y definitivamente nos mester por inverti den un base firme pa nos identidad.
Un base cu ta garantisa cu nos tin e hermentnan necesario pa semper por ta consciente di unda nos tabata, unda nos ta awor y unda nos ta bay. Pasado, presente y futuro. Tres elemento di tempo cu sigur ta necesario pa cualkier persona por crea, mantene y desaroya su identidad. Den mi concepto mesun pensamento ta conta pa un pueblo y un comunidad.
Denis Henriquez ta forma parti di e fabrica di tempo aki y cu un ouvre cu ta cubri varios decada, e ta di berdad un escritor cu ya a yuda forma loke ta e identidad di nos isla.
Cu nos ta awenochi aki pa celebra 2 buki mas cu a sali di e intelecto di Denis Henriquez, ta un indicacion cla di e sosten cu UNOCA ta duna na escritornan y artistanan cu ta yuda forma nos identidad.
Es mas UNOCA ta compromete su mes na sigui brinda e sosten aki. Mas ainda, e ta esencial pa UNOCA inverti den crea oportunidadnan nobo pa inspira mas escritornan y asina eleva y catalisa e produccion di mas obranan na nos propio idioma.
Denis Henriquez su prosa, poemanan y obranan ta producto di su inspiracionnan y di parti di UNOCA mi por bisa cu nos ta sigur cu nan ta sirbi tambe di inspiracion pa e siguiente generacion. Un siguiente generacion di no solamente lectornan, pero tambe esctitornan.
Señor Henriquez, di curason danki pa duna UNOCA e oportunidad di por forma parti di bo creacionnan y obranan literario.
sr. Armin Solognier, director di UNOCA
Scroll To Top