Dia di Biblioteca

23/01/2019

Diabierna ultimo empleadonan di Biblioteca Nacional Aruba a para keto na e trabou di biblioteca na Aruba riba ‘Dia di Biblioteca’.

Minister di Enseñansa, dr. Armando Rudy Lampe, a habri e dia di estudio, un dia pa reflexiona y intercambia idea. Su mensahe tabata cla, ta hopi importante pa innova y pa sigui e desaroyonan nobo den trabou di biblioteca. Biblioteca mester percura pa keda altanto di e desaroyonan den mundo di biblioteca.

Parti mainta e diferente departamentonan den biblioteca a duna presentacion di kico nan trabou diario ta consisti y con ta eherce nan trabou y nan servicio. Parti atardi tabata dedica na servicionan nobo cu a keda introduci manera Makerspace BLAB y Mobile Tech Lab y tambe a para keto na kico ta na caminda pa biblioteca. Otro temanan tabata entre otro: Cambio di e rol tradicional den e era digital, ‘distance learning’ cu a wordo presenta pa Carol Swaen. A focus un rato riba con mucha ta wak biblioteca y kico nan ta desea di mira den e biblioteca den futuro. Danki pa e presentacion di Futura Foundation. Otro invitado, sr. Erwin Ras, a duna un bon splicacion riba ‘Poder di bo actitud positivo’, e actitud di cada persona den proceso di siña (cos nobo) y con importante esaki ta. Biblioteca ta fiha riba su metanan pa 2019 cu energia positivo. Na final di dia a clausura cu un encuentro social.