El mar Cimarrón
23/02/2018
Diaranson dia 30 di september tabatin un presentacion di buki na Museo Arqueologico Nacional Aruba titula ‘El mar cimarron’ di e antropologo Weildler Guerra Curvelo.
Tabata na 2011 durante un bishita cu Museo a compaña Promer Minister, Mike Eman, pa haci un bishita na e poblacion Wayuu di e Guajira Colombiano, cu a cera conoci cu antropologo Weildler Guerra kende ta Gerente di e Sucursal di Banco de la Republica na Riohacha y ta un miembro di e comunidad Wayuu.
Museo a intercambia masha hopi dato y informacion cientifico cu e antropologo y e.o. a tuma nota di un manuscrito cu e tabata trahando riba dj’e. Durante bishita di Dr. Guerra na Aruba na 2012 el a tene un charla basa riba e manuscrito aki, cu ta trata e relacion entre e Wayuu y e lama cu ta rondona su teritorionan.
E rikeza y novedad di e informacion y su balor pa investigacionnan di Museo mes, como tambe pa tur otronan cu ta haci investigacion riba e origen y pasado Amerindio di Caribe, a resulta mesora den un peticion na e autor pa Museo publica e manuscrito den e serie ‘Publications of the National Archaeological Museum of Aruba’.
E buki ta conta di e relacion di e Wayuu y e lama cu ta rondona su teritorio ta di importancia pa cientificonan cu ta studia principalmente restonan di culturanan cu ya no ta existi pa medio di excavacion y estudionan den archivonan. Door di studia un cultura Indian cu ta existi desde Prehistoria te cu awor ainda den nos region nos por sinja masha hopi mes di nos propio herencia.
Cu un sosten financiero unico y substancial di Romar Trading a produci un buki sumamente bunita cu ta di gran balor como documentacion di conocemento y tradicion di un di e unico poblacionnan Indian, cu a sobrevivi desde Pre-historia te awor.
Como balor agrega, pasobra el a ser edita y ta ser publica pa un institucion cientifico den region, e informacion aki ta accesibel pa tur cientifico cu ta trahando den e area aki awendia. Hefe di departamento cientifico di Museo, drs. Raymundo Dijkhoff tabata encarga cu edicion di e contenido cientifico di e buki. E hecho cu e publicacion ta encera un forma inovativo di investigacion lo ta atractivo pa principalmente e partnernan Europeo di Museo.
Museo Arqueologico ta desea di gradici inmensamente Sr. Milton Harms di Romar Trading, e autor Weildler Guerra, e productora ehecutiva di e publicacion señora Maria Teresa Madariaga y fotografía ta di sr. Luis Alonso Castaño Benjumea. Un pabien na tur cu a kere den e proyecto y cu a traha duro pa logra esaki.
