Feria di Papiamento
14/05/2018
Pa celebra cu Papiamento ta cumpli 15 aña como idioma oficial aña 2018 a bira ‘Aña di Papiamento’. Papiamento ta un herencia balioso cu mester proteha, cultiva y pasa p’e generacionnan despues di nos. Papiamento ta cargado di nos historia y cultura. Papiamento t’e conexion entre e miembronan di comunidad Arubiano.
Departamento di Enseñansa tin un exposicion di kita sombre n’e feria aki den e sala grandi di Fort Zoutman. Tin les y charla cortico cu lo kishiki bo pa haya sa mas di Papiamento. Tin basta wega di mesa na Papiamento. Bo tin gana di hunga pe, djul, trom, jacks manera ‘temp’i nos tempo’?
Si bo kier djis sinta wak cine na Papiamento, esey por. Bin scucha storia y tende poetanan declama poema. Musica, canto y baile no por falta. Bendemento di buki, presentacion di buki, demostracion di algun artista, artesania. Bo por mira hasta un musical. Historia y naturalesa tambe ta haya atencion. Y e cushina di The Old Cunucu House lo percura pa ningun hende pasa hamber.
Lugar: E feria ta cubri un area historico cultural di Playa cu ta encera Fort Zoutman, Plaza Padu, parkeo di Censo y e edificio di Cosecha.
Lugar: diasabra, dia 19 di mei 2018, di 4.00 pa 10.00 or pm.
Entrada: No ta cobra entrada. Un boca bisa otro.
Fundacion Lanta Papiamento a haya cooperacion di Departamento di Cultura, Departamento di Enseñansa, Fundacion Museo Arubiano, Cosecha, Instituto Pedagogico Arubano, Muchila Creativo, Fundacion Promove Cultura, Biblioteca Nacional Aruba, Grupo Corector di Papiamento, Fundacion Rancho, Stimaruba y di masha hopi boluntario.
Scroll To Top