BNA - Biblioteca Nacional Aruba

Festival di Buki a Mucha ta habri diabierna awor

30/10/2018

Biblioteca Nacional Aruba ta presenta otro edicion di su Festival di Buki pa mucha. Otro siman, di dia 5 pa dia 9 di november un grupo di autor di buki pa mucha, ilustrador y contadornan di storia ta bishita mas cu sesenta scol, primario, basico y special, riba nos isla. Biblioteca a invita persona di Boneiro Denis de Jongh-Rekwest y Corsou, Alvin Inecia (Tio Ali) y Crisen Schorea y Levi Silvania. Nan ta bishita scol pa conta storia, papia tocante buki cu mucha y tambe pa stimula mucha pa lesa mas.
E apertura di Festival di Buki pa Mucha e aña aki ta tuma lugar diabierna awor 5or di atardi na Cas di Cultura. Lo bay tin diferente presentacion di canto y di baile y tur autor lo tey.

Denise ta bini for di Boneiro pa bishita muchanan di Aruba. El a yega di participa mas biaha na e Festival di Buki pa Mucha pasobra e ta gusta skirbi y conta storia. Denise ta autora di e buki ‘Lanta sin tata’ cu ta trata e mundo di e mucha cu ta lanta sin tata y ki consecuencia esey por tin. Denise tin un interes special pa mucha y tambe etiquette. Denise ta gusta siña mucha bon manera (etiquette) y ta conoci pa su bukinan di ‘Kaylee’ y tambe ‘Gino y Gina’. ‘Gino y Gina’ tabata Regalo di siman na 2010. Denise de Jongh-Rekwest a coordina e proyecto y a haci redacccion final di e buki ‘Taty Frans, Mucha Di Bientu i Laman’. Un di su hobbynan ta fotografia.
Crisèn Schorea (1975), di profesion sociologo, ta di curason un escritor, cantante, actriz, un humilde y ferviente admirador di arte, specialmente arte escenico. Aña pasa Crisen a participa pa di prome biaha na e festival na Aruba y el a gusta hopi. E ta purba un biaha mas pa stimula muchanan pa lesa hopi mas.
Levi Silvanie ta haci presentacion hunto cu Rosabelle Illes. Hunto nan a skirbi e buki ‘Curasonchi’, esaki a wordo ilustra pa Jowy Maasdamme. Nan tin un extra presentacion pa tur mucha na biblioteca O’stad, 3or di atardi.
Tio Ali su nomber di berdad ta Alvin E. Inecia y Tio Ali a nace na Corsou na 1960. For di aña 1994 Alvin Inecia ta activo como Tio Ali. Reconoci y admira pa mayor, docente y otro como e Tio mas creativo, educativo y divertido den ramo di entretenimento pa mucha.

Biblioteca Nacional Aruba ta organisa e festival aki pa stimula lesamento y pa envolvi mucha activamente den e mundo di buki cu un siman di actividad rond di buki.