Georgino (Gino) Vrolijk
01/06/2018
Gino Vrolijk ta docente na scol y e ta autor di buki pa mucha. ‘Sumpi e wanglo sabi!’ ta e prome buki cu Gino Vrolijk a skirbi. E idea pa e storia ta bini ora e ta corda riba con e tawata hunga y pasa tempo den e cunucu di su welo Don Ramon Vrolijk. Locual e no por lubida ta e cantidad di bes cu el a trapa riba wanglo. Ay! E tawata grita cada bes. ‘Na caminda pa e fiesta grandi/Op weg naar het grote feest’ ta su di dos buki cu el a skirbi specialmente pa e Festival di Buki di Mucha na 2013.
Gino Vrolijk a nace riba Dia di Bestia (4 di oktober na aña 1973). E scolnan cu Gino a bay ta Graf von Zinzendorf Kleuterschool, Prinses Irene School, John Wesley College y Colegio Arubano. El a studia na Instituto Pedagogico Arubano y a termina su estudio na 1999.
Gino Vrolijk a cuminsa traha na Colegio Hilario Angela Basisschool na San Nicolas, e disctricto na unda el a lanta como mucha. Despues di 4 aña trahando den 1ste klas el a traha 4 aña na Departamento di Enseñansa, na Desaroyo di Curiculo. Eynan el a haci diferente trabou den cuadro di innovacion pa cu enseñansa primario. Por ehempel traha les pa scol y duna presentacion na maestronan di scol riba e importancia di nos idioma Papiamento den enseñansa. Actualmente Gino Vrolijk ta director di Fontein Kleuterschool na Weg Fontein San Nicolas desde 2008.
Gino su deportenan preferi ta core skateboard. Su wega preferi ta hunga Playstation y carta. Su hobby ta snorkel y hiking.
Tempo Gino tawata chikito, su wela y su mama tawata cont’e un storia tur anochi prome cu e bay drumi. Asina su gusto pa lesamento y buki a crece. Pa Gino Vrolijk conta storia na mucha y lesa buki pa muchanan ta masha importante pasobra ta di e forma aki interes pa lesamento ta cuminsa.
