Gobernador ta conta mucha tocante nos Cas Real
02/05/2019
Diamars ultimo nos Gobernador su excelencia sr. Alfonso Boekhoudt a bishita e muchanan di biblioteca den cuadro di e celebracion ‘Dia di Rey’. Gobernador a conta di nos Rey Willem Alexander y su famia. Tambe el a elabora riba e historia y importancia di nos Cas Real y reino Hulandes. Despues Gobernador a sigui contadi su funcion como representante di Rey na Aruba. Por a ripara cu e muchanan tabata hopi atento di loke nos gobernador tabata conta y nan tabata sa basta caba pasobra nan a contesta tur pregunta bon.
Den e ultimo parti di su bishita, Gobernador Boekhoudt a conta algo di su mes persona, el a conta e muchanan cu e tin 54 aña y ta casa cu Hanneke y cu nan tin 11 yiu, dos pushi, un Siamees y un preto y un par di bestia mas manera parha y tortuga y cu e tin gana di haya un cacho di rasa Labrador. Por ultimo tur e muchanan a saca potret cu nos Gobernador. Sala tabata yen cu muchanan cu hopi atencion pa nos Gobernador su excelencia sr. Alfonso Boekhoudt.
Biblioteca Nacional kier a gradici nos Gobernador pa a duna nos muchanan e oportunidad pa nan conoce Gobernador un poco mas di cerca.
