Kico Kiwi kier awor?

June 28, 2018

Hefe suplente di Biblioteca Nacional Aruba, sra. Lilian Semeleer, a ricibi un bunita obra for di dos miembro di Kiwanis Club of Aruba. Esaki pa e espacio di actividad pa mucha (Verteltoren). Ta trata di un produccion Kamishibai di escritora di buki pa mucha, Liliana Braamskamp-Erasmus titula ‘Kico Kiwi kier awor?’. E obra tin cuater storia pa mucha y ta pa muchanan di scol preparatorio y basico di Aruba.

Kico ta Kamishibai?
Kamishibai ta un estilo di contamento di storia na un grupo di mucha cu a origina na Hapon. Ora un maestro den klas kier conta un storia for di un buki di mucha (prentenboek), constantemente e tin dificultad pa por mustra e muchanan e pintura mientras cu e ta lesa e texto. Ora e maestro mustra e muchanan e pintura e no por lesa e texto y ora e lesa e texto e no por mustra e muchanan e pintura. Kamishibai ta split e pintura y e texto facilitando e contamento di storia na e mucha. Riba un sheet di size A3 e pintura di e storia ta wordo imprimi pa dilanti mientras cu e texto corespondiente ta wordo imprimi parti patras. Ta haci uso di un cashi di palo (un teatro) unda cu ta hinca e sheetnan aden pa facilita y tambe crea mas drama den e contamento di storia. E resultado ta cu e grupo di mucha ta wak e pintura dilanti hopi bon mientras cu e maestro trankilamente por lesa e texto patras.

Esaki ta e di cuater edicion di e proyecto pa mucha Kamishibai di Kiwanis Club of Aruba. Esaki yama ‘Kico Kiwi kier awor?’. E obhetivo di e storia ta pa un uso mas social di cellular den ambiente familiar incluso ora di core auto. E tema aki a wordo escohi inspira riba otro proyecto di Kiwanis yama ‘Don’t text and drive’ pa preveni uso di cellular mientras ta core auto.
Contamento di storia ta stimula e desaroyo di un mucha, principalmente mucha chikito. Kiwanis Club of Aruba ta haci un donacion di teatro di palo y storia na scolnan na Aruba.

Scroll To Top

Newsletter