Lenga di mi mama y Aruban landscapes

23/02/2018

Diamars awor autor Denis Henriquez lo ta na biblioteca pa un presentacion special. Esaki ta cuminsa 7or y mey y ta tuma lugar den hardin di departamento Arubiana/Caribiana na Bachstraat # 5.

Durante e encuentro aki autor Denis Henriquez ta presenta su dos ultimo bukinan “Lenga di mi mama” y “Aruban landscapes” y Sr. Denis Henriquez ta papia tocante su bukinan y kico ta su inspiracion pa skirbi.

“Lenga di mi mama” y “Aruban landscapes” ta dos obra cu a keda ‘drumi algun aña. Den un entrevista Denis ta conta cu nan ta dos obra “cu a keda drumi durante hopi aña. Den bes en cuando mi tabata repasa y edita e texto, cambia algo aki, kita algo aya. Aña pasa mi a dicidi di stroba nan soño dor di laga mi amigo Wim Rutgers tira un bista riba nan. Ta Wim a conseha mi pa sigui traha riba un publicacion. Di un cos a bini otro y e dos compañenan a materialisa den forma tangibel di dos buki.” E dos bukinan ta publica cu sosten di UNOCA.

Denis Henriquez (’45) ta bon conoci den mundo literario di reino. Algun obra cu por menciona di Denis ta e.o.: Ariba tereno di teatro: Mayan Dalia lo ta mi Dalia (1978), Fenchi a gana premio mayo (1981), The Mad T-party (1983) y E soño di Alica (1988). Den ramo di poesia: Kas Pabow (1988) y pa locual ta trata novela: Zuidstraat (1992), Delft Blues (1995) y De zomer van Alejandro Bulos (1999).

Denis Henriquez ta mas conoci cerca studiantenan di tur tempo cu por a scohe pa lesa ‘Zuidstraat’ pa nan lista di Arubaanse literatuur. Zuidstraat ta duna e lesador un bista di e bida den un caya of bario na Oranjestad den añanan cincuenta di siglo pasa. Lo tin oportunidad pa haci e autor pregunta riba su bukinan pero tambe skirbimento. Interesante pa tur esnan cu un curiosidad pa e mundo literario y e proceso cu un autor ta pasa aden pa yega na un produccion completo, su motivacion y inspiracion. Un invitacion ta bay pa publico en general y muy en especial studiantenan cu tin buki di sr. Henriquez riba nan lista pa conoce e autor di cerca. E encuentro aki ta otro siman diamars 21 di april den hardin di Arubiana/Caribiana na Bachstraat 5, Oranjestad, di 7.30 pa 9 or di anochi.

Bo(so) presencia ta hopi aprecia.

Scroll To Top

Newsletter