Mucha por explora habitat di parha na Spaans Lagoen
31/07/2018
Biblioteca hubenil tabatin su programa vacacional pa muchanan entre 6 y 12 aña, cual a hiba como tema “Nos Parhanan”. A cuminsa cu e programa cu sr. Greg Peterson di Aruba Birdlife Conservation na unda e muchanan a haya e oportunidad di traha un obra di man den forma di un shoco. A sigui e siman despues cu un video “Migratory birds” cortesia di Parke Nacional Arikok y aki e muchanan a traha un obra di man den forma di un parha. Siman pasa a toca turno na artista visual Elvis Tromp kende hunto cu e muchanan a dibuha y pinta un Trupial.
Diasabra awor ta clausura e programa vacacional cu un caminata den Spaans Lagoen cu guia di Parke Nacional Arikok pa explora habitat di parha. E actividad aki lo ta di 8or pa 10or di mainta. Un recordatorio pa e muchanan cu a particpa na e programa pa e ultimo actividad aki. Mayornan por confirma participacion na telefon # 582 1580 of # 594 3184. Tin luga pa mas mucha cana y explora hunto cu e grupo. Por fabor, yama prome cu dia 3 di augustus.
Scroll To Top