Mural riba edificio di biblioteca San Nicolas
13/08/2018
Recientemente Aruba Art Fair a anuncia cu nan tin plannan artistico grandi pa e edificio di biblioteca na San Nicolas:
Durante e prome edicion di Aruba Art Fair na 2016, dilanti entrada di edificio di biblioteca na San Nicolas a keda decora cu un mural impresionante di un yuwana. Esaki ta un obra 3D traha cu material recicla. Actualmente e edificio ta den renovacion y e aña aki e ta cla cu su murayanan blanco pa ricibi tres artista di Europa pa transforma e edificio den un obra espectacular. Tres artista, Dmitrij, Mr. Dheo y Pariz One cu a yega di traha varios obra hunto caba.
Dmitrij Proskin, ChemiS, di Kazakhstan conoci na Aruba, pa e obra ‘House of Cards’ riba e murayanan di restaurant Winter garden na San Nicolas, ta escritor y filantrofo. Mr. Dheo, autodidacto desde edad masha hoben a converti su obranan den espectaculo rond mundo. E hoben procedente di Portugal a sa di laga su obranan na mas di 40 pais. Pariz One, artista visual specialisa den Graffiti, tambe di Portugal ta conoci pa su pintura “What Goes Around”. Pariz One a ricibi diferente premio. E ta conoci tambe pa su linea di sportwear di colornan y diseñonan igual na su pinturanan. Lo ta un atraccion special pa wak e artistanan aki traha riba nan obra na San Nicolas na october.
San Nicolas den dos aña di tempo a converti su mes den e lugar di atraccion pa e turista cu kier mira algo mas durante di su estadia. Plannan strategico, incluyendo artistanan, entre nan e mihornan di mundo ta wordo busca pa sigui presenta arte y murals na San Nicolas.
Produccion di un otro edicion di ‘Aruba Art Fair 2018’ cu curador Jimmy Yanez, ta posibel danki na e partnership di entre otro, Aruba Tourism Authority Sui Generis, Prins Bernard Fonds Caribe, UNOCA, Divi Resorts Aruba, Kooyman BV, AIS y VNO y hopi artista local y internacional.
Scroll To Top