Presentacion di 3 obra literario di Jossy Tromp
23/02/2018
Diaranson 25 di maart 2015 sr. Jossy Tromp ta presenta 3 obra literario na Papiamento na Biblioteca Nacional Aruba na George Madurostraat 13. Un cuenta ficticio titula ‘Tera di Waltaca’, un obra di teatro ‘Camind’i cruz’ y un obra di poesia ‘Na caminda’. E anochi cu canto, charla y declamacion ta cuminsa 7or y mey y tur hende ta bonbini.
Jossy Tromp (Aruba, 1954) a studia Biologia y Ley. Den su storianan por reconoce elementonan di e cultura tradicional. Otro publicacionnan di sr. Jossy Tromp ta: “Un anochi y otro cuenta Arubiano”, ‘ Cetilalma y otro cuentanan Arubiano’ (1988) y ‘E biento di atardi y otro cuentanan Arubiano’ (1998), E barbulet preto y otro cuenta Arubiano (2007), Gabilan (2009), 13 cuenta (2011). ‘Camind’i cruz’ ta un obra cu Jossy a cuminsa skirbi e manuscrito na 1979, tempo cu e tabata biba na Utrecht. ‘Na caminda’ ta su di dos tomo di poesia.
Por lesa un analises di Tera di Waltaca skirbi door di Joe Fortin den Bon Dia di 10-april-2015, pag. A15. Tambe den edicion di 11 di april.
E presentacion ta den cuadro di celebracion di Dia Internacional di Poesia y Dia Internacional di Teatro. Ta un honor pa Biblioteca Nacional Aruba, Instituto Pedagogico Arubano y Departamento di Cultura Aruba pa presenta tres obra literario skirbi pa e autor Arubano mr. drs. Jossy Tromp. Ta trata di tres diferente genero di literatura esta prosa, poesia y teatro. Di e forma unico aki e autor ta demostra su versatilidad den expresion literario.
Durante e anochi lo tira un bista riba carera y trayectorio musical di Chencho Kelly. Acualmente tin un exposicion pa Chencho Kelly su ‘Bida den musica’ na cas di mayornan di Betico Croes, den cuadro di e celebracion di Dia di Himno y bandera.
Scroll To Top