Presentacion di ‘De stille ruimte’ na biblioteca
23/02/2018
Dialuna ultimo a tuma lugar un presentacion di buki di ARTA (sinonimo di sra. Marjorie Rumnit) na Biblioteca Nacional Aruba. E buki ta titula ‘De stille ruimte’ y e ta e di dos publicacion di ARTA.
Den ‘De stille ruimte’ e autora ta dirigi su mes na hoben cu e meta pa desaroya confiansa propio, engrandece fe y stimula crecemento spiritual.
ARTA ta describi su motivacion pa skirbi e buki ‘De stille ruimte’ di e manera aki, “Tieners en pubers in groepsverband observerende, viel het mij op hoe kwetsbaar een opmerking, blik of gebaar van iemand beleefd kan worden. Op een nog jongere leeftijd blijkt vriendschap sluiten gemakkelijker en verdraagzaamheid moeiteloos. Dan komt een periode waarin er ook wordt gelet op uiterlijkheden en smaak, hoe de één zich kleedt en hoe de ander loopt of de haren draagt. Opmerkingen en plagerijen hierover raken vaak diep en leiden soms tot ongewenste complexen, agressie of verdriet in meerdere of mindere mate”.
“Ik voelde een sterke behoefte om deze leeftijdsgroep te helpen sterk te staan en op een positieve manier zelfbewust te zijn”.
ARTA tin un mensahe pa hoben: “Je moet jouw instelling herzien, zodat de belevenis in situaties eerder verrijkend is dan kwetsend. Ik zal met jullie kennis delen waardoor je jezelf en anderen in een ander licht zult zien. Inzichten die versterken, jouw begrip voor de ander doet hebben en waardoor je een verdiepend respect en relatie zult krijgen met het leven en met het zijn, met je zelf. Lieve tieners en pubers, dit boek is voor jullie. ARTA ”.
Na 2013 su prome obra ‘Insights of truth’ a keda publica. Tur dos publicacion a wordo subsidia pa UNOCA. Por lesa mas di e prome publicacion riba e website di biblioteca.
Sra. Nilda Koolman como representante di UNOCA a haci e introduccion. E ilustracion y diseño grafico di e buki ta di e artista, sra. Irene Peterson. Riba portada por wak un chispa cu ta duna e idea di energia, di color gel/oro cu segun Marjorie ta representa sabiduria. Rond di e chispa ta wak tambe e color blou cu ta representa e spirito of alma y inmortalidad. Color rose ta representa amor incondicional. Den e chispa un espacio ‘keto’ caminda un ser humano por haya trankilidad y contacto cu su mes y Dios. E imahen ta expresa transmision di luz. Esaki ta e idea cu e autora kier expresa y cu artista Irene Peterson a sa di capta cu e imahen. Sra. Marjorie Rumnit ta papia un poco di spiritualidad y ta recita un poema titula ‘Star child’, un poema cu el a lesa hopi biaha pa su nieta Caitlin Silvania. Na final Marjorie ta guia e publico presente den un meditacion cortico. E presentacion ta caba cu entrega oficial di e buki na algun hoben y na famia di sra. Marjorie Rumnit.
Tambe sra. Rumnit a regala Biblioteca Nacional Aruba algun ehemplar pa e coleccion nacional y pa circulacion bou miembro. Aña di publicacion ta 2014 y su ISBN ta 978-99904-1-590-2. E buki ta obtenibel na librerianan y tambe na UNOCA.
Scroll To Top