Presentacion di obra di poesia ‘Kita paña fo’i cabuya’ na biblioteca
23/02/2018
Dialuna awor, den sala di exposicion na Biblioteca Nacional Aruba, Reginald “Quake” de Palm, artista visual y autor ta presenta su prome buki. E presentacion di buki ta cuminsa 6or y esaki ta wordo combina cu un exposicon di cuadra. Publico ta bon bini entre 6’or di atardi y 8’or di anochi.
de Palm a nace na Aruba, for di mayornan di Boneiro y Corsou y a biba na tur e tres isla. Esaki, segun de Palm, ta haci cu e contenido cu e ta trece dilanti tin un toke diferente. Reginald de Palm ta skirbi poesia, ta pinta y ta composita cantica.
For di hopi jong e artista aki a cuminsa pinta. Despues di a participa na algun workshop, de Palm bou guia di sr. Timothy Charles, a pinta su prome cuadra na color y a participa den un exposicion y a gana e “People’s choice award”.
de Palm cu for di añanan 90 ta composita y skirbi poesia a dicidi di pone esakinan hunto den un buki, pa presenta e coleccion completo na publico. E obra titula ‘Kita paña fo’i cabuya’ ta contene 109 poesia/storia cu de Palm a skirbi den e ultimo 12 aña.
Sr. Quito Nicolaas, como un critico literario, a duna su comentario riba e contenido di e buki, cual ta poni riba e portada di e buki asina’ki: “…E buki ta combina y intercambia realidad di su propio bida cu realidad di bida di otronan cu un toke comico…”
Reginald de Palm ta recita algun poema durante e anochi. Publico ta bon bini na e presentacion aki. E artista tambe ta habri alabes un exposicion di algun obra di acrylico riba canvas cu ta keda na biblioteca te cu e prome siman di januari 2014. E medio mas usa ta acrylic on canvas, tin biaha eleva cu gel. No tin un tema specifico ma ta varia di instrumento, fruta pa edificio, usando un mescla di abstract pa diferencia e trabou for di e otronan ariba mercado. Den e expo aki Reginald “Quake” de Palm ta presenta mas cu 20 obra di su prome expo “Unlimited Edition” cu un 30 porciento di obra nobo. E exposicion ta habri durante orario di biblioteca.
Scroll To Top