Aruba in literair perspectief : Tussen traditie en vernieuwing: 1905-1975
23/02/2018
UNOCA y Editorial Charuba, conhuntamente cu Biblioteca Nacional Aruba, ta invita un y tur pa un presentacion di un investigacion di literatura di Aruba di dr. Henry Habibe titula “Aruba in literair perspectief : Tussen traditie en vernieuwing: 1905-1975”. E presentacion ta diahuebs 26 di maart den hardin di Dept. Arubiana/Caribiana na Bachstraat 5 y ta cuminsa 7or y mey.
Henry Habibe ta un persona bon conoci den mundo literario na Aruba y den Reino Hulandes. El a nace na Aruba (1940), na unda el a biba te su 16 aña. El a bay studia na Hulanda y a obtene su grado academico den Lenga y Literatura Spaño. El a traha na Aruba como docente di Spaño y Papiamento di 1971 te 1977. Despues el a biba un aña na Puerto Rico, caminda el a haci investigacion literario na Universidad di Río Piedras tocante e poesia ‘Afro-Antiyano’.
Na 1985 Henry a doctora cu e disertacion “El compromiso en la poesia afro-antillana de Cuba y Puerto Rico” na Rijksuniversiteit di Leiden. Actualmente Henry ta biba na Hulanda. Banda di su poesianan Henry ta conoci pa su ensayonan y su estudionan literario. Regularmente e ta publica den corant y revista. E ultimo añanan aki dr. Henry Habibe a dedica na un investigacion cientifico cu a resulta den e buki ‘Aruba in literair perspectief’.
Publico general ta bonbini na Arubiana/Caribiana pa 7or y mey di anochi. Bo(so) presencia ta altamente aprecia.
Scroll To Top