Rescate di memoria

11/10/2019

Diahuebs, 17 di october 2019, di 7.00 p.m. pa 10.00 p.m, lo tin un actividad na Biblioteca Nacional Aruba, George Madurostraat,Oranjestad, dedica na Rescate di Memoria, “Pasobra bo tambe ta conta”.

Biblioteca Nacional Aruba, Departamento di Cultura Aruba hunto cu gestor cultural Mirto Laclé lo presenta un programa multidisciplinario cu enfoke riba e diferente disciplinanan di literatura, arte, cultura, lingüistica y educacion en general. Tin invitadonan special y lo duna reconocemento na algun musico y artista local, entre otro Taly Wever, Ronny Kock, Johnny Scharbaay y Frank Williams. Ta presenta diferente documental, musica , canto, baile, declamacion y poema filma acompaña cu imagen di Rooi Manoonchi. Tambe lo presenta un documental produci pa George Jacobs y Mirto Laclé “Na caminda pa un centenario y celebracion centenario di Jose “Jo” Dania”.

Taly Wever ta un musico, artista, cantante: un ‘embahador’ trobador cu a aporta  cu su talento tanto na Aruba como den exterior, den Caribe, Sur-America te Italia.

Ronny Kock ‘El ruiseñor de Savaneta’: musico, artista, cantante, compositor, fundador di steelband Jumping Jewels y coach di diferente grupo di steelband na Aruba. Ronny a cultiva diferente genero di musica y tambe a desaroya diverso sorto di instrumento. Su aporte na transfer, sapiencia y conocemento na otro pa asina continua musica como deleite pa otro, ta di balor significativo.

Johnny Scharbaay ta un musico, pianista virtuoso, cu a sali for di e cuna di famia Camacho di Savaneta. Johnny Scharbaay, icono musical Arubano cu a dedica un bida na studia y investiga musica y a actua como musico pianista tanto local como internacional, pa huespednan distingui y di Cas Real y cu bandanan di taya universal.

Frank Williams, maestro, docente di idioma den enseñanza secundario, educador, actor di teatro y poeta. Frank Williams a contribui cu enseñanza di Aruba tanto dilanti di clas, como inspector di enseñanza, observador y dirigente. Frank a destaca como artista di teatro y a skirbi algun obra di teatro. El a compila poema , a traduci na Ingles y a skirbi historia di poesia, Isla di mi, cu ayudo di Wim Rutgers.

 

Scroll To Top

Newsletter