Presta y entrega

BNA – Biblioteca Nacional Aruba

Na biblioteca un persona por lesa buki, revista of corant, consulta enciclopedia y otro material di referencia cuanto cu e ta desea. E servicio aki ta completamente gratis. Na momento cu un persona ta desea di fia material, e ta bira miembro di biblioteca. Tin e biblioteca principal na Oranjestad y tin un sucursal na San Nicolas.

Pa bira miembro (y tambe renoba un miembrecia) nos ta pidi pa trece un identificacion valido. Por trece sea un paspoort, rijbewijs of cedula. Den caso cu un mucha of hoben no tin esaki, ta pidi pa e mayor bin cu su identificacion (of carch AZV di e mucha). Miembrecia ta valido pa un aña. E miembrecia ta costa:

  •  Mucha di 0 -12 aña     Afl. 1,00 pa aña                       Por fia tres buki (pa 4 siman)
  • Hoben di 13 – 18 aña  Afl. 3,00 pa aña                       Por fia cuater buki (pa 4 siman)
  • Adulto (riba 18 aña)    Afl. 5,00 pa aña                       Por fia cuater buki (pa 4 siman)

Turista y stagiaires ta deposita un suma di Afl. 100,00 of $50 si nan kier bira miembro pa un periodo corto. Biblioteca ta debolbe e suma aki despues cu tur material a keda entrega.

Perdida

Si a perde e carchi di miembrecia por fabor pone biblioteca na altura. Pa reemplaza e carchi, adulto ta paga Afl. 10,00 y mucha y hoben ta paga Afl. 5,00. Sin carchi no por fia material di biblioteca. Por fabor, sea asina bon di avisa biblioteca ora cu tin cambio di adres. Ta pidi pa no duna otro hende e carchi. Cada miembro ta responsabel pa e material cu a wordo fia riba su carchi.

Miembrecia

Biblioteca Nacional Aruba ta contento cu cada miembro nobo. Biblioteca Nacional Aruba ta duna cada miembro nobo un recorido den biblioteca. Prijs pa miembrecia ta masha abou mes. Cinco florin pa miembrecia pa adulto, tres florin pa hoben y un florin pa mucha. Biblioteca ta ofrece banda di un coleccion grandi di buki cu storia y tur topico tambe actividad sano pa un y tur.

Ta posibel pa fia mas buki.
Un mucha por tin maximal dos carchi di miembrecia, cu cada carchi por fia tres buki.
Hoben por tin maximal dos carchi di miembrecia, cu cada carchi por fia cuater buki (maximal tres buki di departamento di mucha.)
Adulto por tin maximal tres carchi di miembrecia (cuater buki riba cada carchi) y un carchi di mucha (tres buki).
Como miembro di Biblioteca Nacional Aruba por fia buki tanto na Playa como na nos sucursal na San Nicolas.

Prestamo, entrega y orario

Pa facilita cada miembro di biblioteca mas tanto posibel biblioteca ta ofrece e servicio cu por busca buki tanto na Biblioteca na Playa como na sucursal San Nicolas. Ta keda na e miembro pa scohe e biblioteca mas cerca riba su ruta. Kizas e miembro ta biba na San Nicolas pero ta traha of ta bay scol na Playa of net lo contrario.

Biblioteca Nacional Aruba ta facilita su miembronan tambe pa haci entrega di buki na e sitio di nan escohencia, sea na Playa of e sucursal na San Nicolas. E cantidad maximo di buki ta keda igual.

Pa purba na yega di duna mas tanto hende posibilidad pa bishita biblioteca,  ta habri 5 anochi di dialuna pa diabierna. Biblioteca na Playa ta habri 3 anochi den siman te 7’or, dialuna, diaranson y diabierna. Biblioteca na San Nicolas ta habri 2 anochi den siman te 7’or, diamars y diahuebs.

Prolonga

Si ta desea e termino por wordo prolonga cu tres siman mas. Esaki por solamente si no tin otro persona cu mester di e bukinan.

Por yama pa pidi e servicio aki. Ta pidi pa haci esaki na tempo, en todo caso prome cu e fecha stipula pa entrega e material. Asina cu e fecha di entrega pasa no por pidi e servicio aki via telefoon mas, sino mester pasa personalmente pa cancela e boet. Por fabor yama biblioteca O’stad – # 582 1580 ext. 240 of San Nicolas – # 584 5277.

Ta posibel pa reserva buki. Asina cu e buki drenta nos ta yama e miembro pa pasa busca e buki cu e mester. Por reserva te cu cuater buki. E servicio aki ta gratis. Mucha por reserva te cu tres buki.

Scroll To Top

Newsletter