Trabou di biblioteca ta sigui

20/09/2019

Bibliotecaria sra. Olivia Figaroa a cumpli 35 aña trahando na biblioteca y actualmente Olivia Figaroa ta den su ultimo aña di trabou y ta cuminsa planea kico ta haci despues. Orguyoso y satisfecho di su carera como bibliotecaria Olivia ta haya lesamento awe mes importante cu e tempo cu el a dicidi di studia pa e profesion aki.

Lesamento ta hopi importante pa desoraya vocabulario, pensamento, perspectiva, creatividad y conocemento di mundo y e cosnan rond di bo. Biblioteca mes a desaroya hopi tambe durante e 35 aña manera por a lesa den ultimo publicacion cu biblioteca ta celebra ’70 aña di trabou di biblioteca na Aruba’ y ta sigui ofrece servicio nobo segun e trendnan den mundo di biblioteca. Sra. Olivia Figaroa durante su carera a keda involvi den diferente proyecto pa mucha manera e Festival di Buki pa Mucha y actividad di atardi como tambe programa di lesamento di vakantie. Actualmente ta coordina e servicio na MFA den diferente bario na Aruba banda di su tareanan regular.

Olivia ta poco preocupa si pa e trabou por sigui como cu tin mas bibliotecaria ta yegando e edad di pensioen y mester profesional hoben pa duna e organisacion mas energia dinamico y moderno. Olivia ta desea pa motiva mas studiante pa scohe pa e bunita profesion aki y traha den un area hopi special. E ta kere cu bibliotecanan semper lo exisiti y lo duna comunidad loke mester na literatura, informacion y entrenimento, bon storia y mucho mas.

Bibliotecaria Olivia Figaroa tocante trabou di bibliotecaria:

Segun bibliotecaria Olivia, “Un studiante cu ta gusta lesa, ta interesa riba diferente topico y cu ta social por scoge pa studia pa ‘Information specialist’ manera e estudio y profesion yama awor.

“Mi persona for di tempo cu mi a siña lesa, mi tawata interesa den lesa tur loke ta skirbi, e por ta un buki, corant, revista. Ma yega di lesa como mucha buki di adulto sin comprende masha e contenido pero e tabata un buki”.

“Den klas mi no tawata haya leesbeurt pasobra ya ma caba di lesa e buki cu nos tawata lesa ‘om de beurt’ den klas. Cada klas tawatin un reki chikito cu buki. Mi ta caba den un par di luna di lesa tur, (eigenlijk pa mi no papia den klas, e juffrouw ta permiti mi pa mi coy un buki pa lesa pa mi no strobe). Esey kiermen cu ora mi bay over y drenta den e otro klas, ya caba ma lesa e bukinan ey caba pasobra ora ma lesa tur di mi klas,mi tawata di mag di bay busca un di un otro klas. Mi tawata scohe dimes e siguiente klas por ehempel mi ta den derde y mi ta bay lesa esnan di vierde klas”.

“Mi tabata un alumno di St. Anna school y Bibliobus tambe tawata pasa St. Anna school y mi tawata percura pa ami subi e bus prome pa asina mi por fia e bukinan dimas nobo. E chauffeur cu despues a bira mi colega tawata keda draai rond cu e bus pa tentami pasobra mi tawata core tras di e bus. Lesamento tawata y ta habri un mundo pami, mi a siña conoce otro culturanan, otro paisnan etc”. Den voortgezet onderwijs mi tawatin permiso pa bay biblioteca na Playa, ta manera ma yega den “Luilekkerland”. Hopi buki pa lesa”.

“Ma dicidi di bay studia pa bibliotecaria. E tempo ey e estudio tawata consisti di dos aña pa bira assistant bibliotecaris y despues un aña specialisacion. Por a scohe pa bibliotecaria hubenil, bibliotecaria pa adulto, bibliotecaria pa schoolbibliotheek, pa muziekbibliotheek y pa documentalista. (Awor bo ta studia 4 aña pa bira Information specialist na un HBO). Ami a scohe pa bibliotecaria hubenil”.

“E trabou ta ensera hopi, pa yuda e miembro scoge un buki di su gusto, bo mester ta na altura di contenido, di e edad di e miembro, di su nivel di lesamento. Ta hopi importante pa e miembro fia un buki cu ta na su gusto y cu ta pone pe bin bek y sigui lesa. Ora di order buki, mester tene cuenta cua ta e topiconan cu nan gusta of ta haya na scol. Cua tipo di buki ta mas lesa, buki di spanto?, buki di aventura?, buki di bestia ? etc. Pa no lubida esnan mas chikito cu nan sa lesa ainda. Buki di prenchi pa nan wak of pa mayornan conta nan. Cada buki tin su edad y nivel pa e miembro. Ta importante pa purba di cumpra tur sorto di buki y pa no laga bo preferencia personal domina loke bo ta ordo. Pa tur hende mester tin un variedad den e coleccion. Un reto ta keda semper pa wak si bo a logra di tin un miembro contento cu loke e a bay cas cune. Tin di sigui cambionan mundial riba tereno cu tin di haci cu trabou di biblioteca, keda busca riba internet e bukinan cu ta mas pidi, e conferencianan cu por atende. E cambionan den sistemanan automatisa. Contactnan pa tin cu otro instancianan di bo pais y bibliotecanan di otro pais”.

Olivia ta clausura enfatisando cu: “Lesa no solamente ta yudabo relaha pero ta desaroyo bo mente na un forma unico. Ta siña bo pa bira mas tolerante, sabi, bo sa hopi mas palabra cu otronan, bo por ta mas expresivo”. Su quote preferi ta di autor di Corsou Roland Colastica: “Mas bo lesa, mas bo sa, mas bo sa, sabi bo ta “

Scroll To Top

Newsletter