Un bookclub por ta algo pa bo?
14/02/2018
Bo ta gusta lesa? Y bo kier sa kico otro ta pensa di un buki? Abo kier expresa bo opinion? Kizas un bookclub ta algo pa bo…
Un bookclub ta wordo forma dor di un par di hende cu ta gusta lesa y cu ta gusta intercambia di idea y comparti experencia. Bo ta haya e oportunidad pa combersa cu otro riba e storia, e tema di un buki, e estilo di skirbi, e autor y su meta cu e buki y otro aspectonan di e buki den un ambiente ameno.
Miembronan por ta di ambos sexo, diferente edad, y diferente background cultural. E miembronan di e grupo hunto por scohe un buki of cada un ta haci su mes escohencia. Despues di un par di siman ta bini hunto pa combersa cu otro. Sea na cas di un miembro, na biblioteca of na un cafe, den parke, canti lama, unda sea….
E manera mas simpel pa cuminsa un bookclub ta pa invita algun amiga(o) of conoci pa lesa un buki hunto cu bo y pa despues analisa e buki/tema. Despues por invita otro hende. Indica e fecha y e ora y lugar pa topa. No cuminsa cu mucho hopi hende, esei ta haci e discussion menos manehabel. 4 pa 6 persona ta ideal.
Si abo ta tuma e initiativa, e prome encuentro por ta cerca bo y bo ta guia e combersacion. Despues ta scohe un otro persona pa ta anfitriona pa e proximo encuentro. Por topa cada 4 pa 6 siman, esei ta depende di e miembronan di e grupo.
Pa guia un encuentro ta bon pa prepara e combersacion dor di nota algun pregunta, algun punto di discusion riba papel. Duna cada miembro e oportunidad pa comparti algo cu e grupo. E dushi di un bookclub ta cu bo ta siña for di otro, bo ta haya sa con un otro persona ta wak cierto cos of con e ta interpreta cierto cos. Bo ta lesa algo otro kizas for di loke bo ta custumbra di lesa. Bo ta sera amistad cu otro. Si bo ta desea di join un Bookclub di biblioteca manda un mail pa [email protected]
Scroll To Top