Vanessa and friends

28/08/2018

Vanessa gusta e tema di e Festival di Buki pa Mucha di e aña aki masha hopi mes. E ta un tema cu bo ta wak bek den su obranan y tambe e ta gusta pinta mucha. Ta pesey Vanessa ta e artista ideal pa e proyecto di un buki special pa mucha, e regalo di siman. Biblioteca ta produci tur aña un buki pa mucha pa su Festival di Buki pa Mucha. E biaha aki esaki ta un coleccion di storia di diferente autor. Aki un par di siman nos ta conta un poco mas di e buki.

Prome cu e proyecto aki Vanessa a ilustra e buki ‘The search for Streya’ di escritora Tina Causey-Bislick. Vanessa su ilustracionnan pa buki di mucha semper ta colorido y nan tin un expresion vibrante. Pa e buki cu ta yega Aruba pronto Vanessa a traha cu diferente material, verf di acryl, kleurpotlood, stift, pastelkrijt, tambe collage y poco editing den Photoshop y illustrator (Mixed media). Pero di tur tecnica e ta gusta pinta na man mas cu tur. Esey ta keda su manera preferi pa yega na un imahen atractivo. Vanessa ta yame ‘Old school’, e manera tradicional di dibuha, sketch y pinta. Algo cu ta sinti hopi natural pa Vanessa.

Vanessa gusta cacho masha hopi mes. E tin 3 amigo, nan yama Hypo, Sweetie y Haipo. Nan tin mag di bay tur caminda cu ne, hasta den su studio. Como cu Vanessa ta gusta cacho el a skirbi un storia di un puppy pa conta mucha den klas.

Di chikito caba Vanessa tabata gusta moda y pinta y diseña paña, su prome trahe di baño el a diseña cu 5 of 6 aña. El a usa un blusa di su mama pa cose algo nobo pa e por a bay landa den laman. Ta nada straño cu na grandi el a bay studia Fashion design na Hulanda. Artistanan cu e tabata admira antes ta Rembrandt, Dali y Rob Scholte pero e ta studia obra di hopi artista rond mundo.
Despues di su estudio Vanessa a traha den diferente ramo pero un dado momento el a bay bek den su arte y el a bay mas den direccion di ilustracion y den esaki e gusta e temanan ‘Hende muhe’, ‘Mucha’, ‘Amistad’ y ‘Amor’. E ta documenta recuerdonan, tambe recuerdonan di e tempo cu e mes tabata mucha. Su temanan normalmente ta den un background y setting Caribeño.

Vanessa ta considera su Studio como un lugar sagrado caminda e ta haya e trankilidad pa yega na loke e kier expresa, sin wordo stroba. Djis su cachonan por wak kico e ta traha e biaha aki. Ora cu e ta sinti cu e obra ta cla e por mustra mundo.

Den futuro e lo kier traha mas riba ‘empowerment’ di hende muher y mucha. Specificamente riba yuda hende muher y mucha expresa nan mes mas. Pa esaki tin diferente tecnica y Art therapy ta uno. El a yega di duna workshops ‘Soul Art’ y e ta kere den su efecto sano y positivo.

Vanessa ta diseña e logo di e Festival di buki pa mucha tambe. Es decir, e ta full involvi den e proyecto di biblioteca y den e siman di e festival e ta bishita hopi mucha di scol pa mustra su trabou y pa conta storia.

© Entrevista cu bibliotecaria Gina Jie Sam Foek, Augustus 2018

Scroll To Top

Newsletter