Benjamin Romero
05/12/2018
Durante lesamento di E Caya di Monche e lector lo descubri tres componente clave: biografico, historico y genealogico, esta di historia di famia. ‘E Caya di Monche’ ta conta un etapa di e bida di e papiamentista Ramon Todd Dandaré (Monche), tempo di su infancia y hubentud den Elleboogstraat. Tambe e ta relata, entre otro, su formacion como academico y linguista, sigui pa su experticio den nos lenga materno.
E autor a hinca e biografia aki den un contexto historico defini, rescatando echo y personahe fo’i den e bahul di olvido. Contrario na E Negoshi di Koffie na Aruba -e prome obra di e autor aki- e obra ‘E Caya di Monche’ ta menos periodistico y mas literario.
E ta describi e comunidad cu tabata biba den Elleboogstraat entre 1940 y 1965. Nan a comparti cu otro no solamente nan idioma, sino tambe nan cultura, tradicion, custumber, gastronomia etc. E tin di haber cu presencia di e prome ola di inmigrante Latino Americano cu a bin establece na Aruba. Tambe di otro nacionalidad cu a convivi den e caya marginal aki localisa den pleno curason di Playa.
Presentacion di e buki ‘E Caya di Monche’ di Benjamin Romero a tuma lugar na Biblioteca Nacional Aruba na november 2018. Benjamin Romero ta forma parti di redaccion di matutino Bon Dia.
Scroll To Top