Bin, bin, sigui mi Submarin
27/09/2019
Denise de Jongh-Rekwest, un biaha mas tin e placer di forma parti di Festival di buki na Aruba. Denise a nace na Corsou anto ta biba na Boneiro. Denise ta experto riba tereno di turismo y etiketa. Denise ta skirbi y publica buki pa su mes anto tambe pa diferente otro outor di Aruba, Boneiro, Corsou y Hulanda via su propio empresa di publicacion Request Publishing.
Durante Siman di Ban Lesa 2019, Denise cu hopi cariño lo presenta su buki nobo ‘Bin, bin, sigui mi submarin’. Tur scol basico di Aruba lo ricibi e buki aki regalo. Cu ‘Bin, bin, sigui mi submarin e’ autor ke yuda conscientisa mucha cu mester cuida nos medio ambiente. E cuenta ta motiva mucha pa evita uzo di plastic, haci uzo di reciclahe y tene nos islanan limpi. E mucha ta lesa pa e diberti y na mes momento e ta siña cu tene su ambiente limpi ta un actitud positivo y duradero. ‘Bin, bin, sigui mi submarin’ ta contribui grandemente na desaroyo sostenibel di medio ambiente. Pa sa mas di Denise de Jongh por bishitá su website www. Requestpublishing.com
Nos ta contento cu participacion di Denise un biaha mas. Y nos ta spera cu e muchanan disfruta di presentacionan di Denise durante su bishita na e scolnan. Biblioteca Nacional Aruba ta organisa e festival aki pa stimula lesamento y pa envolvi mucha activamente den e mundo di buki cu un siman di actividad rond di buki. Un festival di buki cu participacion di mas cu 60 scol preparatorio, basico y special riba nos isla cu lo ricibi bishita di autor, ilustrador y contador di storia.
E actividadnan ta tuma lugar diferente caminda, tanto na biblioteca como na diferente scol. E apertura di Festival di Buki pa Mucha e aña aki ta tuma lugar diabierna 6or di atardi dia 1 di november na Cas di Cultura. Lo bay tin diferente presentacion di canto y di baile.
