Blab Makerspace na biblioteca San Nicolas

21/01/2020

Awor biblioteca na San Nicolas tambe tin su Blab Makerspace pa tur cu tin gana di experimenta.

E maker space ta duna acceso publico na varios mashin pa fabricacion digital incluyendo 3D printers, laser cutter, vinyl cutter, CNC cutter, como tambe ‘programmable boards’ mane Arduino y Raspberri Pi y power tools mas tradicional pa traha cu palo mane drill press, bench sander, planner y table saw.

E meta di e makerspace ta pa avansa democratisacion di tecnologia y innovacion. Dor di expande acceso na material pa asina por diseña y desaroya producto y idea nobo. Tanto pa hoben como adulto amateur y professional. Ademas lo organisa algun workshop, cuminsando cu Robotics club pa hoben tur diamars atardi di 4or pa 6or, y lo bin cu mas actividad durante aña.

Esaki ta un proyecto financia dor di UNOCA cu apoyo di Biblioteca Nacional Aruba, Futura y Metabolic Foundation. E espacio tin un modelo “pay what you can” unda ta pidi un donacion di 5 florin per uso di e lab plus e costo di material si ta al caso (10 ct per gram di 3D print). E modelo “pay what you can” kiermen cu si e usuario no tin e fondo pa paga esaki e por paga menos y esnan cu por duna un tiki mas esaki ta wordo aprecia. Si tin hende cu lo kier algun producto diseña y desaroyo pa nan esey lo wordo haci bou un prijs mas commercial.

Blab ta invita comunidad di San Nicolas pa pasa merdia y wak pa nan mes kico por haci.

Scroll To Top

Newsletter