Damnatio ad Bestias
05/03/2020
Autor local sr. Vivienno “Vi” Frank Jr. ta presenta su prome buki titula ‘Damnatio ad Bestias’ diahuebs 12 di maart proximo, pa 7:30 di anochi, na Biblioteca Nacional Aruba na Playa. Portanan ta habri 7or di anochi y entrada lo ta gratis pa publico, un y tur ta bon bini.
Un bestia unico, cu por hari y mata su prohimo p’un florin. Esaki ta e subtitulo di e buki ‘Damnatio ad Bestias’ cu cual sr. Vivienno “Vi” Frank Jr. ta haci su debut como escritor. Un buki skirbi den idioma Papiamento. Ta trata a aki di un thriller solamente pa adulto completamente di propio origen di Aruba. E eventonan ta tuma luga na Aruba. Te con leu cu ta conoci, e buki(nan) pa adulto di e indole aki na nos idioma ainda no ta existi. Por bien ta cu den e caso aki por papia di un genero nobo na nos isla: ‘Thriller Crioyo’.
Anselmo Zievinger, e conocido maestro di scol, escritor, filosofo y baluarte nacional, ta muri un morto sumamente cruel … Un persona ta dicidi di haci un denuncia publico cu aki no ta trata di un morto natural, si no di un crimen premedita. Hopi hende na Aruba ta descarta e denuncia aki como algo emocional. Sinembargo, otronan si ta dicidi di busca drechi kico tin di berdad den e denuncia aki. E secretonan cu nan lo descubri ta di un indole asina hororoso, cu nan lo inicia sucesonan cu lo laga e isla completo den shock.
E buki cu titulo “Damnatio ad Bestias” – traduci libremente fo’i Latin: ‘Condena n’e Bestianan’ – por wordo clasifica na Ingles como un ‘Psychological Crime Horror Thriller’, un thriller psicologico criminal cu elementonan di horor den dje. E titulo na Latin ta relaciona n’e evento di mesun nomber den Roma antiguo caminda Cristiannan y otro nan condena na morto, tabata wordo tira den arena di Colosseum yena cu bestianan salvahe.
Kico ta defini un thriller? Kico ta e diferencianan den su sub-genero nan? Kico ta e diferencia entre teror, horor y suspenso? Pakico a scoge e titulo aki y pakico na Latin?
Tur esaki y mas por haya sa n’e charla cu Vi Frank Jr. lo tene diahuebs 12 di maart proximo, cuminsando pa 7:30 di anochi, na BNA na George Madurostraat 13, caminda lo tin e placer pa Vivienno “Vi” Frank Jr. en persona presenta su buki debut, un thriller sicologico criminal titula ‘Damnatio ad Bestias’.
