Exposicion ‘Ora Ubao’ ta habri
20/10/2020
E exposicion pa Festival di Buki pa Mucha ta habri. Esaki ta na biblioteca Oranjestad y ta keda habri un par di siman pa tur mucha por bishita esaki. Biblioteca ta presenta tur imahen di e buki ‘Ora Ubao’ (Schelpeneiland) pa medio di su exposicion.
Tur mucha y nan mayor por wak e ilustracionnan cu ta den e buki nobo. ‘Ora Ubao’ a keda ilustra pa artista visualElvis Tromp. Riba potret por wak un di e ilustracionnan. Durante e siman di e festival Elvis ta haci un presentacion special pa mucha di tur edad. E exposicion sigur sigur ta inspira docente y mucha pa lesa e buki ‘Ora Ubao’. E exposicion ta habri di 8or di mainta pa 5or di atardi y diaranson anochi te 7or. Tur mucha ta bon bini.
Ora Ubao: Ta un buki nobo yen di storia cortico y poema tocante diferente topico di historia di Aruba. Pa su Festival di Buki pa Mucha, Biblioteca Nacional Aruba a traha riba produccion di un buki pa mucha. Esaki en cooperacion cu Levendig Uitgeverij na Hulanda. E produccion nobo titula ‘Ora Ubao’ ta un publicacion di diferente storia y poema historico pa mucha. E publicion ta na 2 idioma, Papiamento y Hulandes. Contribucion ta di e escritornan di buki pa mucha Liliana Erasmus, Jeroen Hoogerwerf, Lizzy van Pelt y Robert Reeberg. Ilustracionnan ta di artista visual Elvis Tromp. Na Hulandes e titulo ta ‘Schelpeneiland’. Biblioteca ta produci e buki pa tur mucha na Aruba, ta pesey ta percura pa e ta na 2 idioma. Tin storia pa mucha di edad di 4 pa 12 aña. Cu cada compra di un buki na boekhandel Van Dorp & DeWit y Plaza Bookstore ta haya e buki aki regalo.