Historia di futbol di Aruba 1909-1959
02/07/2018
Sr. Francisco ‘Fico’ Vrolijk a publica su buki ‘Historia di futbol di Aruba 1909-1959’. Sr. Francisco ‘Fico’ Vrolijk a haci investigacion den corant bieu y otro publicacionnan na departamento Arubiana.
Francisco Vrolijk desde aña 1999 a cuminsa compila informacion y storianan di futbol local. Esaki a pidi un investigacion profundo, pasobra nunca ningun hende a skirbi detayadamente. E mester a bay bek den corantnan, cu ta yega te na aña 1940. Pa pasa den den corantnan mas bieu, manera Amigoe di Corsou, Fico a biaha pa Corsou. Tambe el a bay Baranquilla, Colombia pa verifica algun informacion adicional. A haya informacion na Hulanda for di Koninklijke Bibliotheek.
Fundacion Lotto pa Deporte (FLpD), Arubaanse Voetbal Bond (AVB) hunto cu Aruba Sport Unie (ASU) a anuncia e publicacion cu hopi alegria y satisfaccion. Hunto nan a carga e gastonan.
“Loke a inspira mi, na 1999, tabata ora cu internet a yega Aruba. Mi mes no tabatin computer. Un cuña tabatin computer y internet. A bay busca informacion riba internet di baseball y futbol. Ey a topa cu un website special cu storia di futbol di casi tur pais di mundo, resultadonan, campeonnan, torneonan internacional, etc. Pero di Aruba no tabatin nada. M’a pensa di busca tur e informacionnan aki pa asina suministra e websitenan ey pa Aruba tambe por participa den e banco di dato. Nilo Croes, cu e tempo ey tabata Presidente di AVB, a duna mi e idea e ora pa en bes di mande riba website pa e publica un buki”, asina Francisco Figaroa a conta den su mesun palabranan.
E buki ta na color y ta contene no menos di 310 pagina, cu mas o menos 250 potret y a imprimi esaki na Imprenta Panamericana na Bogota, Colombia. E intencion ta pa despues, skirbi un di dos edicion cu e historia di aña 1960 pa awor. Sheila Werleman a yuda den e layout pa garantisa un buki di calidad.
Historiador Dufi Kock su feedback ta:“Colega Francisco. Pa skirbi buki di historia no ta nada facil. Pero Francisco a demonstra di tin e fe y perseverancia pa logra algo asina importante den nos historia. Awo nos a bira colega di otro. Pabien y exito cu e buki aki. Mi ta pidi tur hende busca e buki aki pa bo archivo”.
Scroll To Top