“Kere den bo soñonan y haci nan realidad den bo bida”

08/10/2019

Un grupo grandi di autor di buki pa mucha y ilustrador ta duna contenido na e Festival di Buki pa Mucha 2019. Nan ta bishita scolnan rond Aruba den prome siman di november 2019. Biblioteca a invita autor di Hulanda, Corsou y Boneiro, Colombia y e grupo mas grandi ta nos talentonan local.

Di Aruba ta participa un grupo bon conoci den mundo di buki pa mucha; Richard Dabian, Sergio Tjie-A-Loi, Olga Buckley, Shaila Vrolijk y Emerita Emerencia. E grupo aki ta bishita diferente scol for di dia 4 pa dia 8 di november.

Sergio Tjie A Loi ta un musico, e ta compone cantica pa mucha y ta guia coro di mucha. E ta gusta lesa, skirbi stria y conta storia. Ta pesey e ta participa pa di 4 biaha den Festival di Buki pa Mucha. Su mensahe ta ‘Kere den bo soñonan y haci nan realidad den bo bida’ manera e mes ta haci ora cu su talento, un soño y oportunidad ta bini hunto. Sergio ta wak bishita pa scol como un dushi oportunidad pa comparti su musica, canto, storia y comedia cu mucha. E ta gusta combersa cu mucha y cera amistad. Sergio su medio di transporte ta burico, ta pesey e ta bishita e parke di burico hopi, hasta ela hiba e fotografo di biblioteca eynan pa saca su potret!

 

Scroll To Top

Newsletter