Presentacion di un modelo di e submarino U-156 na Archivo

10/02/2020

Diabierna, dia 14 di februari, historiador y escritor Dufi Kock ta presenta un modelo di e submarino U-156 cu lo sirbi pa sigui informa pueblo tocante e guera loke ta concerni nos isla. Presentacion ta di 4’or pa 6’or di atardi na Archivo Nacional Aruba (ANA).

Nos tur por corda cu dia 10 di mei 1940 e Nazinan a invadi Hulanda. E mesun anochi aki na Aruba nos a haya un sabor di e guera ora cu Capitan Ferdinand Schmidt ta sink su barco, E.S. Antilla pabou di Malmok pa no entreg’e na e militarnan Hulandes. Pero e guera mes a cuminsa aki na Aruba dia 16 di feburari 1942, pa 1:31 di marduga, ora cu Capitan Werner Hartenstein cu su submarino U-156 ta torpedea SS Pedernales y dos minuut despues pa 1:33 ta torpedea y sink SS Oranjestad net dilanti di rif di Lago. Despues e ta manda 16 cayon riba Lago pero suerte a toca Lago y nos isla cu pa motibo di varios eror, no tabatin mucho daño. Despues e ta sigui pabou na waf di Eagle y ta manda tres torpedo riba e barco Arkansas mara na waf di Eagle. Un torpedo ta dal e barco pero sin mucho daño, uno ta bay den fondo di lama y un otro ta bay riba e beach. Despues Hartenstein ta bay for di Aruba y na 340 miya pariba di Barbados un avion militar Mericano, un Catalina PBY cu su capitan, Dryden ta sink e submarino U-156 y tur tripulante ta muri.
Dia 14 di februari proximo, entre 4’or pa 6’or di atardi, e presentacion lo tuma luga na Archivo Nacional Aruba.

Scroll To Top

Newsletter