Superheroe di Storia
30/10/2019
E programa Superheroe di Storia ta un proyecto di Fundacion Bon Nochi Drumi Dushi, cu a inicia na 2018. E programa ta envolvi mucha den edad di 5 pa 7 aña, cu no por lesa completamente independiente ainda, pa participa activamente den e proceso di contamento di storia y amplia nan placer di ‘lesamento’.
Pa curasha nan pa ta parti di e storia di nan mesun creacion, a stimula nan den forma di wega interactivo, pa pone atencion na e mundo rond di nan y crea personahenan cu ta enfoca riba aspectonan cu mester atencion. Boluntarionan di FBNDD a documenta e storianan cu e muchanan a conta y a formalisa nan den documento skirbi.
Artistanan local pasiona a cana man den man cu nos superheroenan pa guia nan den e proceso di diseña nan trahenan di Superheroe.
Nos superheroenan ta orguyoso cu nan soño a wordo realisa. Nana a presenta nan buki di Superheroe y habri e exposicion den e siman di apertura di siman di buki. Di e proyecto aki lo bay haci un exposicion mobil cu lo bay rond y lo por wordo admira na diferente parti di Aruba cuminsando na Biblioteca Oranjestad dia 29 di october.
Pa esnan interesa den un ehemplar di e buki, esaki lo ta obtenibel cerca miembronan di comision, directiva di FBNDD y libreria na november 2019.
FBNDD a haci uzo di e momento festivo aki pa presenta tambe e miembronan di directiva nobo, cu desde januari 2019 a pone nan schouder bou di e proyecto pa sigui promove e placer di lesamento manera BNDD ta custuma di haci pa mas di un decada caba. E directiva nobo ta consisti di: Presidente, Sra. Rachel Kraayvanger, Vice Presidente Sr. Randy Ras, Secretaria Sra. Milvienne Dijkhoff, Tesorero Sra. Shuredley de Mei, Comisario Sra. Zulaika Geerman.
Scroll To Top