Tayer pa docente
02/10/2019
Biblioteca Nacional Aruba ta organisando su evento anual, Festival di Buki pa Mucha. E preparacionnan ta bayendo bon. Actividadnan di Festival di Buki pa Mucha 2019 ta den luz di e tema ‘Medionan di transporte’. Pa comunica e tema na tur scol y mucha ta scohe un lema cada aña. E aña aki e lema ta ‘Ban lesa, gosa y biaha!’ Esaki ta un tema cu por haci hopi cu ne y biblioteca ta pidi tur guiador cu ta traha cu mucha pa ta creativo den duna contenido na e tema. Tin workshopnan ta tumando lugar na biblioteca y facilitadornan ta sra. Angelique Maduro y sr. Mirto Laclé. Nan ta trata di duna guia y idea na docente con pa stimula mucha pa lesa mas y lesa hunto den klas. Meta ta pa ofrece inspiracion pa haci algo cu e tema con pa traha cu e tema aki den buki, contamento di storia y otro expresion. Biblioteca Nacional Aruba ta ofrece mas informacion toacante e festival pa medio di su website. Workshopnan ta tuma lugar henter e siman aki di 3or pa 5or di atardi na biblioteca na Playa. Pa pregunta riba e organisacion por email sra. Michelle Thiel-Roos, [email protected] of yama tel. # 582 1580.
